Na Mwandishi Wetu.
Sekta ya uzalishaji nchini Tanzania imeendelea kuonesha kasi ya ukuaji na ushindani wa kimataifa, baada ya makampuni ya ndani kufanikiwa kutwaa vyeti na tuzo za ubora katika ngazi za kikanda za Afrika Mashariki na Kusini mwa Afrika.
Kupitia hafla maalum iliyoandaliwa na Shirika la Viwango Tanzania (TBS), zaidi ya makampuni nane ya Kitanzania yalikabidhiwa vyeti na tuzo za ubora kutoka Jumuiya ya Afrika Mashariki (EAC) pamoja na Jumuiya ya Maendeleo Kusini mwa Afrika (SADC).
Akizungumza katika hafla hiyo, Mkurugenzi Mkuu wa TBS, Dkt. Ashura Katunzi, alieleza kuwa mafanikio hayo ni uthibitisho wa juhudi kubwa zinazofanywa na makampuni ya ndani katika kuzingatia viwango vya ubora vinavyokubalika kimataifa.
“Hii ni hatua muhimu kwa Tanzania. Inaonesha wazi kuwa bidhaa zetu zinaweza kushindana na kukubalika katika masoko ya kikanda na kimataifa,” alisema Dkt. Katunzi.
Aliongeza kuwa mafanikio hayo yamechangiwa kwa kiasi kikubwa na uwekezaji unaoendelea kufanywa katika teknolojia za kisasa za uzalishaji, ubunifu wa bidhaa pamoja na usimamizi madhubuti wa viwango vya ubora.
Hivyo, leo tunatambua na kusherehekea mafanikio makubwa ya makampuni ya Tanzania ambayo yameonesha ubora, ubunifu na ushindani katika ngazi ya kikanda. Mafanikio yenu ni fahari sio tu kwa kampuni zenu bali pia kwa taifa letu.
Orodha ya washindi kutoka Tanzania ni kama ifuatavyo:
Said Salim Bakhresa & Co. Ltd – LE Bidhaa ya Mwaka – Mshindi (EAC)
GCLA – Huduma ya Umma ya Mwaka – Mshindi wa Pili (EAC)
Rafael Logistic (T) Ltd – LE Huduma ya Mwaka – Mshindi wa Pili (EAC)
Tanzania Breweries Ltd – LE Kampuni ya Mwaka – Mshindi wa Pili (EAC)
AJA (T) Ltd – SME Mzalishaji wa Kilimo – Mshindi wa Pili (EAC)
Zanlink Ltd – SME Huduma ya Mwaka – Mshindi wa Pili (EAC)
Simba Pipe Industries – SME Bidhaa ya Mwaka – Mshindi wa Tatu (EAC)
Simba Pipe Industries – SME Bidhaa ya Mwaka – Mshindi wa Pili (SADC) , alisema Dkt. Ashura.
Kwa mujibu wa TBS, ushindi huu sio tu unaleta heshima kwa nchi, bali pia unafungua milango mipya ya kibiashara kwa makampuni ya ndani kupanua masoko yao nje ya mipaka ya Tanzania.
Katika upande wa washindi, mmoja wao, Bi. Happiness Nyiti kutoka AJA Tanzania Ltd, alieleza kuwa tuzo hiyo ni chachu ya kuongeza juhudi katika uzalishaji.
“Tunapongeza sana TBS na Serikali kwa kutuwezesha kufikia kiwango hiki. Sasa tuna nafasi kubwa zaidi ya kushindana kimataifa,” alisema.
Mafanikio haya yanaashiria mambo makubwa matatu muhimu kwa uchumi wa Tanzania:
Kuimarika kwa ubora wa bidhaa za ndani – bidhaa zinazalishwa kwa viwango vinavyokubalika kimataifa
Kuongezeka kwa ushindani wa kimataifa – makampuni ya Tanzania sasa yanaingia kwenye ramani ya biashara ya kimataifa
Fursa mpya za soko – upanuzi wa biashara katika nchi za EAC na SADC
Zaidi ya hapo, hatua hii inaongeza imani ya watumiaji wa ndani na nje ya nchi kuhusu ubora wa bidhaa zinazozalishwa Tanzania.
TBS imeahidi kuendelea kushirikiana na wadau mbalimbali wa sekta ya viwanda ili kuhakikisha kuwa makampuni mengi zaidi yanapata vyeti na tuzo hizi, huku yakihamasishwa kuwekeza katika ubunifu na teknolojia.
Kwa mtazamo mpana, mafanikio haya yanaweka msingi imara wa Tanzania kuwa kitovu cha uzalishaji wa bidhaa zenye ubora wa hali ya juu barani Afrika.
0 Comments