NDILITO APATA TIKETI YA CCM CHAMWINO

 

Na Hamida Ramadhan, Matukio Daima Media Dodoma

ZAIDI ya asilimia 70 ya kura za maoni alizopata Dkt. Netho Ndilito zimemuwezesha kupata uteuzi wa Chama Cha Mapinduzi (CCM) kuwania ubunge wa Jimbo la Chamwino, katika mchakato uliowakutanisha wagombea 34.

Akizungumzia hatua hiyo baada ya kuchukua fomu za kugombea ubunge, Dkt. Ndilito amesema ushindi alioupata katika kura za maoni unaonesha imani waliyoionesha kwake wananchi wa Chamwino, huku akieleza kuwa CCM inaendesha shughuli zake kwa kufuata taratibu na mifumo ya kitasisi.

Ametumia nafasi hiyo kuwashukuru viongozi na kamati za chama kuanzia ngazi ya kata, wilaya hadi mkoa, akisema ushirikiano wao ulikuwa sehemu ya safari yake ya kuwania uteuzi ndani ya chama.

Aidha, amewataka wagombea wenzake walioshiriki katika mchakato wa kura za maoni kuweka pamoja nguvu zao na kufanya kazi kwa ushirikiano, akisisitiza umuhimu wa mshikamano kuelekea uchaguzi ujao.

Dkt. Ndilito amesema kwa sasa anatarajia kukamilisha hatua zinazofuata kwa kujaza na kurejesha fomu kwa kuzingatia maelekezo ya chama. Pia, amewahimiza wananchi wa Chamwino kujitokeza kuunga mkono CCM pamoja na Dkt. Samia Suluhu Hassan katika uchaguzi ujao.