Na Mwandishi Wetu.
Dar es Salaam. Katibu Mkuu wa Wizara ya Habari, Utamaduni, Sanaa na Michezo ambaye pia ni Msemaji Mkuu wa Serikali, Bw. Gerson Msigwa, ametembelea banda la Taasisi ya Teknolojia Dar es Salaam (DIT) katika Maonesho ya 50 ya Kimataifa ya Biashara ya Dar es Salaam (Sabasaba), na kuelezea kuvutiwa kwake na kiwango cha ubunifu kinachoendelea kufanywa na taasisi hiyo katika kuandaa suluhisho za teknolojia zinazojibu mahitaji ya taifa.
Akiwa katika banda hilo, Bw. Msigwa alipata fursa ya kujionea bunifu mbalimbali zilizobuniwa na wanafunzi pamoja na wahadhiri wa DIT, zikiwemo teknolojia za kisasa katika sekta za nishati, viwanda, TEHAMA na usafirishaji. Miongoni mwa bunifu zilizovutia zaidi ni bajaji ya umeme, ambayo imebuniwa kwa ushirikiano wa wanafunzi na walimu wa DIT ikiwa ni sehemu ya jitihada za kuhamasisha matumizi ya teknolojia rafiki kwa mazingira na kupunguza gharama za usafiri.
Ziara hiyo imeonyesha kwa mara nyingine uwezo mkubwa wa DIT katika kuzalisha wataalamu na wabunifu wenye uwezo wa kutatua changamoto za jamii kupitia sayansi, teknolojia na ubunifu. Kwa miaka mingi, taasisi hiyo imeendelea kuwa kinara wa tafiti na ubunifu unaochochea maendeleo ya viwanda na uchumi wa Tanzania.
Bunifu zinazotengenezwa na DIT si za maonesho pekee, bali zinaakisi dira ya kujenga uchumi wa viwanda unaotegemea maarifa, utafiti na teknolojia. Miradi hiyo inaonesha jinsi vijana wa Kitanzania wanavyoweza kubuni bidhaa na mifumo yenye ushindani wa kimataifa ikiwa watawezeshwa ipasavyo.
Ushiriki wa DIT katika Sabasaba 2026 umeendelea kuwavutia maelfu ya wageni wanaotembelea banda hilo kila siku, wakijionea teknolojia za kisasa zinazobuniwa na Watanzania. Ziara ya Bw. Gerson Msigwa ni ishara ya kutambua mchango mkubwa wa DIT katika kuendeleza ubunifu, kuimarisha sekta ya viwanda na kuifanya Tanzania kuwa kitovu cha teknolojia na uvumbuzi barani Afrika.
0 Comments