NA MATUKIO DAIMA MEDIA
Mahakama nchini Nigeria imemhukumu kiongozi wa vuguvugu la kujitenga, Nnamdi Kanu, kifungo cha maisha baada ya kumkuta na hatia katika mashtaka saba yanayohusiana na ugaidi.
Kanu, kupitia kundi lake la Indigenous People of Biafra (IPOB), alikuwa akiongoza harakati za kutaka kuanzisha nchi yake kwa kudai uhuru wa eneo la kusini mashariki linalokaliwa na kabila la Waigbo.
Hukumu hiyo imetolewa Alhamisi na Jaji James Omotosho, ambaye alisema upande wa mashtaka umeonyesha kuwa matangazo na maagizo ya Kanu kwa wafuasi wake yalipelekea mashambulizi dhidi ya maafisa wa usalama na raia. Vurugu hizo, kwa mujibu wa mahakama, zilikuwa sehemu ya kampeni yake ya kutaka kutengeneza mamlaka ya Biafra nje ya serikali ya Nigeria.
Jaji Omotosho alisema haki ya kujitawala ni ya kisiasa, lakini alisisitiza kuwa juhudi za kuanzisha nchi mpya bila kufuata Katiba ya Nigeria ni kinyume cha sheria.
Ingawa waendesha mashtaka walitaka Kanu ahukumiwe adhabu ya kifo, mahakama iliamua kutoa kifungo cha maisha, ikibainisha kuwa adhabu ya kunyongwa inapoteza uungwaji mkono katika jumuiya ya kimataifa.
Kanu ana siku 90 kukata rufaa dhidi ya uamuzi huo. Kabla ya hukumu, aliondolewa mahakamani baada ya kupinga mwenendo wa kesi akidai kuwa kurejeshwa kwake kutoka Kenya mwaka 2021 kulifanyika kinyume cha taratibu, jambo alilosema lilimnyima haki ya usikilizwaji wa haki.
Harakati za IPOB zinarejesha kumbukumbu za jaribio la kujitenga la mwaka 1967, lililosababisha vita vya wenyewe kwa wenyewe na vifo vya zaidi ya watu milioni moja taswira pana ya changamoto zinazozuka pale juhudi za kuunda taifa jipya zinapopingana na mamlaka ya nchi mama.
0 Comments