MDAU wa maendeleo wilayani Kilolo mkoani Iringa Aidan Mlawa amehimiza Kila Mwananchi mwenye sifa ya kushiriki Uchaguzi kujitokeza kutimiza wajibu wake wa kujiandikisha katika daftari la wapiga kura ili kushiriki kikamilifu kwenye uchaguzi wa viongozi wa Serikali za Mitaa.
Mlawa ambae ni mkurugenzi wa Kampuni ya John Galt Hauliers alitoa wito huo leo baada ya kujiandikisha katika Kituo cha Ilula-Itunda, kilichopo Kata ya Ilula, wilayani Kilolo, mkoani hapa .
Alisema hatua hiyo ya kujiandikisha inampa sifa ya kushiriki uchaguzi huo muhimu utakaofanyika Novemba 27, 2024.
Mlawa alisema kuwa Kuna umuhimu wa wananchi kujiandikisha ili waweze kutumia haki yao ya msingi ya kuchagua viongozi watakaowawakilisha katika ngazi za mitaa na vijiji.
Alisema kuwa ushiriki wa kila raia mwenye sifa ni msingi wa demokrasia na maendeleo endelevu katika jamii.
“Uchaguzi wa Serikali za Mitaa ni fursa muhimu kwa wananchi kushiriki moja kwa moja katika mchakato wa kuleta maendeleo.
Hivyo alishauri viongozi wanaochaguliwa wanahusika moja kwa moja na changamoto za kila siku za wananchi, hivyo ni muhimu kupiga kura kwa kuwachagua wale watakaowajibika ipasavyo,” alisema Mlawa.
Alipongeza juhudi za Tume ya Taifa ya Uchaguzi (NEC) na Serikali kwa kuweka utaratibu mzuri wa uandikishaji wapiga kura, akisisitiza kuwa ushiriki wa wananchi wengi zaidi utahakikisha viongozi bora wanachaguliwa. 
Aidha, aliwataka vijana na watu wa rika zote kutumia nafasi hiyo kujiandikisha kwa wakati na kushiriki katika uchaguzi.
Mlawa pia alieleza umuhimu wa kuwa na viongozi wanaojali maslahi ya jamii, hasa katika maeneo ya vijijini ambako changamoto za huduma za msingi kama maji, barabara, na elimu bado ni kubwa. Alisema kuwa uchaguzi huu unatoa nafasi ya kuwapata viongozi wanaoweza kutatua changamoto hizo kwa weledi na uwajibikaji.
Hivyo aliwataka wakazi wa Kilolo kujitokeza kwa wingi, Mlawa alisema: “Tusipoteze nafasi hii ya kihistoria. Uchaguzi huu ni wetu sote, na kila kura ni sauti ya mabadiliko tunayoyataka katika jamii yetu.”
Alisema kuwa ushiriki wa kila mmoja siyo tu haki ya kikatiba bali pia ni jukumu la kila raia mwenye mapenzi mema na taifa lake.
Kwa upande mwingine, alitoa wito kwa wadau wa maendeleo kuunga mkono mchakato wa uchaguzi kwa kushirikiana na jamii katika kuhamasisha amani na mshikamano kabla, wakati, na baada ya uchaguzi. “Tunahitaji kuendelea kuwa wamoja kama taifa, hata baada ya uchaguzi,” aliongeza.
"Uchaguzi wa Serikali za Mitaa wa mwaka huu unatarajiwa kuwa wa ushindani mkubwa, huku wananchi wakitarajiwa kuchagua viongozi watakaosimamia maendeleo ya maeneo yao kwa miaka mitano ijayo"
Alisema kuwa uandikishaji wa wapiga kura utaendelea kwa siku kadhaa, na NEC imehimiza watu wote wenye sifa kujiandikisha mapema ili kuepuka msongamano wa mwisho.
Mlawa alisema kuwa kujiandikisha mapema inaonyesha mfano mzuri wa uwajibikaji wa raia katika kushiriki shughuli za kijamii na kisiasa kwa manufaa ya taifa.
0 Comments