Mahakama kuu ya Umoja wa Mataifa kwa kauli moja imeiamuru Israel kuwezesha usafirishaji wa misaada bila vikwazo hadi Gaza ili kuepusha baa la njaa.
Mahakama ya Kimataifa ya Haki (ICJ) ilisema Israel lazima ichukue hatua "bila kuchelewa" ili kuruhusu "utoaji wa huduma za kimsingi zinazohitajika haraka na usaidizi wa kibinadamu".
Israel imetaja madai kuwa inazuia misaada kama "yasiyo na msingi kabisa".
Pia imekanusha madai ya mauaji ya halaiki yaliyowasilishwa katika mahakama ya ICJ na Afrika Kusini na imelaumu Umoja wa Mataifa kwa matatizo na usambazaji wa misaada.
Uamuzi wa hivi punde zaidi wa mahakama ya The Hague unakuja baada ya Afrika Kusini kuitaka mahakama hiyo kuimarisha amri iliyotolewa kwa Israel mwezi Januari kuchukua hatua zote za kuzuia mauaji ya kimbari huko Gaza .
Ingawa amri zilizotolewa na ICJ ni za kisheria, mahakama haina uwezo wa kuzitekeleza.
Wiki iliyopita, ripoti ya Mpango Jumuishi wa Chakula Duniani , ambayo inaendeshwa na Mpango wa Chakula Duniani na wengine, ilionya kwamba hali ya "janga" inaendelea.
Ilisema kuwa watu wote milioni 2.2 huko Gaza "wanakabiliwa na viwango vya juu vya uhaba wa chakula" na kwamba njaa inakadiriwa kuathiri kaskazini mwa eneo hilo kabla ya mwisho wa Mei.
Katika uamuzi wake, ICJ ilisema Gaza "haikabiliwi tena na hatari ya njaa" bali "njaa inaingia" na kwamba, kulingana na waangalizi wa Umoja wa Mataifa, watu 31, ikiwa ni pamoja na watoto 27, tayari wamekufa kwa utapiamlo na upungufu wa maji mwilini.
Pia ilibainisha maoni ya Volker Türk, kamishna mkuu wa haki za binadamu wa Umoja wa Mataifa, ambaye alisema wiki iliyopita kwamba "hali ya njaa" ni "matokeo ya vikwazo vikubwa vya Israeli katika kuzuia kuingia na usambazaji wa misaada ya kibinadamu na bidhaa za biashara. , kuhamishwa kwa watu wengi, pamoja na uharibifu wa miundombinu muhimu ya raia" unaotekelezwa na Israel.
Mahakama ilisema Israel lazima "ichukue hatua zote zinazohitajika na zinazofaa ili kuhakikisha, bila kuchelewa, kwa ushirikiano kamili na Umoja wa Mataifa, utoaji usiozuiliwa kwa kiwango... wa huduma za kimsingi zinazohitajika haraka na usaidizi wa kibinadamu".
Msaada uliohitajika zaidi ni pamoja na chakula, maji, umeme, mafuta, malazi, na nguo pamoja na bidhaa za usafi na vifaa vya matibabu, ilisema.
Uamuzi huo pia ulisema Israel lazima ihakikishe "jeshi lake halifanyi vitendo vinavyoashiria ukiukaji wa haki zozote za Wapalestina huko Gaza" chini ya Mkataba wa Mauaji ya Kimbari.
Miezi ya hivi majuzi imeshuhudia misururu mirefu ya lori za misaada zikitokea mara kwa mara wakati yakingoja kuingia Gaza kutoka Misri, na shutuma zilizotolewa kwa Israel kwamba inaweka mizigo hiyo katika ukaguzi tata na wa kiholela.
Katika mawasilisho yake wiki iliyopita, Israel iliitaka ICJ kutotoa amri ya hivi punde zaidi, ikisema madai ya Afrika Kusini "hayana msingi kabisa na sheria" na "yanachukiza kimaadili".
Pia imetupilia mbali kesi pana inayoletwa dhidi yake chini ya Mkataba wa Mauaji ya Kimbari kama "isiyo na msingi".
Israel imesema kuwa Hamas inachukua sehemu kubwa ya misaada inayoingia Gaza na kushutumu Umoja wa Mataifa kwa kushindwa kusambaza kile kilichosalia kwa raia.
Mzozo wa sasa ulianza baada ya shambulio la Oktoba 7, ambalo lilishuhudia watu wenye silaha wakiongozwa na Hamas wakivamia mpaka na kuingia Israel, na kuua karibu watu 1,200 na kuwachukua zaidi ya wengine 250 mateka.
Kati ya waliochukuliwa, takriban 130 hawajulikani waliko, takriban 34 kati yao wanakisiwa kuwa wamekufa.
Wizara ya afya ya Gaza inayoendeshwa na Hamas imesema kampeni ya kulipiza kisasi ya Israel imeua takriban watu 32,552. Mapema mwezi huu, Waziri wa Ulinzi wa Marekani Lloyd Austin alisema kuwa, kati ya waliouawa, zaidi ya 25,000 walikuwa wanawake na watoto.
0 Comments