SERIKALI YASIFIA MRADI KUREJESHA WATOTO KWENYE FAMILIA ZAO

Na Matukio Daima APP,Dar es Salaam

SERIKALI imetoa wito kwa Taasisi zisizokuwa za kiserikali ambazo

zinajihusisha na malezi ya watoto waishio kwenye mazingira magumu

kuwajengea uwezo maafisa ustawi wa jamii ili waweze kutekeleza vyema

majukumu yao yakiwamo kulea watoto ambao hawana wazazi.

Wito huo ulitolewa leo Juni 8 mwaka 2022 na mwakilishi wa Wizara ya

Maendeleo ya Jamii, Hadija Kissa alipokuwa akifungua mafunzo kwa

maafisa ustawi wa jamii waliopo kwenye mradi wa kuwarejesha kwenye

familia zao watoto wanaolelewa na taasisi isiyokuwa ya kiserikali ya SOS Village Tanzania.

Hadija alisema mradi huo wa SOS umekuja wakati muafaka kwani utasaidia

watoto ambao walikuwa wakiishi mbali na familia zao za asili kupata

ndugu zao.

Hata hivyo aliitaka SOS kuhakikisha wanatatua na kuainisha changamoto

zilizofanya watoto kama hao kuzikimbia familia zao.

“Niwapongeze SOS kwa kazi hii nzuri, lakini nitoe wito kwao

wahakikishe zile changamoto zilizowatoa hao watoto kwenye familia zao

zinabainishwa ili ziweze kupatiwa ufumbuzi. Wote tunajua kwamba moja

ya changamoto za watoto kama hao kukimbia familia au makazi yao ya

asili ni pamoja kufanyiwa ukatili, kukosa chakula na mambo mengine

kama hayo”alisema Hadija.

 “Niwapongeze zaidi SOS kwa juhudi hizi, mpango huu ninaouzindua leo

umekuja wakati muafaka kwani utapunguza watoto wengi kulelewa mbali na

familia zao lakini pia Serikali kuona ni wapi iweke nguvu kukabiliana

na suala la watoto wa mitaani”alisema Hadija.

Akizungumza kwenye uzinduzi huo, Mratibu wa Malezi mbadala wa SOS

Tanzania, Onesmo Itozya alisema mradi huo niwa miaka mitatu na unahusu

watoto wenye umri chini ya miaka sita.

Alisema watoto waliopo kwenye mpango huo wa kurejeshwa kwenye familia

zao ni 272 hadi kufikia mwaka 2024 na utahusishwa wale waliokuwa

wanalelewa kwenye vituo vya SOS kutoka mikoa mbalimbali Tanzania bara

na Zanzibar.

Itozya alisema kabla ya kuanza mpango huo, SOS ilifanya tafiti

mbalimbali kubaini changamoto na chanzo cha watoto hao kutoka makwao

na kuzifanyia kazi ili zisije kujirudia.

“Tunataka watoto hawa ambao tumekuwa nao kwenye makao ya SOS kwa

kipindi kirefu, wengine tumekaa nao kwa zaidi ya miaka 10 tuwarejeshe

kwenye familia zao ili waendelee kufurahia maisha wakiwa kwenye

tamaduni zao, koo zao, wajomba, mashangazi mababu kama walivyo watoto

wa familia zingine.

“Katika utafiti wetu tumegundua baadhi ya watoto hatuna ulazima wa

kuendelea kukaa nao kwani wana ndugu zao wa damu, hivyo

tunawaunganisha nao ili waweze kuendelea na maisha ya familia zao

halisi.

Hata hivyo, Mratibu huyo wa SOS alisema wale ambao wamebainika hawana

makawao au ndugu zao hawakubainika wakishavuka umri wa miaka sita

watapatiwa makazi mengine mbadala.