MAREKANI YAONDOA NDEGE ZAKE ZA KIVITA KUTOKA KAMBI YA FAIRFORD UINGEREZA

Marekani imeondoa ndege zake zote za kivita kutoka Kambi ya Anga ya RAF Fairford nchini Uingereza, kituo cha kijeshi kilichokuwa katikati ya uchunguzi wa polisi wa kukabiliana na ugaidi.

Afisa mmoja wa Marekani alithibitisha Jumapili kuwa ndege zote za kivita zilizokuwa zimepelekwa katika kambi hiyo zimerejeshwa katika vituo vyake vya kudumu nchini Marekani.

Marekani haikutoa sababu rasmi ya hatua hiyo. Hata hivyo, uamuzi huo umefuatia tukio la kiusalama lililotokea Septemba 27, wakati polisi walipopokea taarifa kuhusu magari matatu yaliyokuwa yakitiliwa shaka karibu na kambi hiyo ya anga iliyoko Gloucestershire.

Taarifa hiyo iliripotiwa awali na gazeti la Wall Street Journal kabla ya Pentagon kutoa uthibitisho rasmi saa chache baadaye.

"Kutokana na sababu za kiusalama, haikuwezekana kuthibitisha uhamishaji wa vifaa na wanajeshi. Hata hivyo, sasa tunaweza kuthibitisha kuwa ndege zote za Marekani zilizokuwa zimepelekwa RAF Fairford zimerejea katika vituo vyake vya kudumu nchini Marekani," Pentagon ilisema.

Katika taarifa yake, wizara hiyo ilisisitiza kuwa Jeshi la Anga la Marekani linaendelea kuwa tayari kutekeleza operesheni za mashambulizi ya usahihi wa hali ya juu popote duniani.

"Kikosi kinachosimamia ndege za B-1, B-2 na B-52 kina uwezo wa kutekeleza operesheni za masafa marefu kutoka Marekani na kurejea nchini. Uwezo huu upo tayari kutumika wakati wowote na mahali popote," ilisema taarifa hiyo.

Kwa mujibu wa Wall Street Journal, uamuzi wa kuondoa ndege hizo unahusishwa na wasiwasi wa kiusalama katika Kambi ya Anga ya Fairford. Wiki iliyopita, watu kadhaa walikamatwa kwa tuhuma za kuhusika katika kile kilichoelezwa kuwa njama inayoweza kuhusishwa na ugaidi karibu na kambi hiyo.

Hata hivyo, washukiwa hao baadaye waliachiliwa kwa dhamana. Polisi wa Uingereza walisema hawakupata vilipuzi wakati wa upekuzi wa magari matatu ya aina ya van, bali walikuta kiasi kidogo cha petroli pekee.

Baada ya tukio hilo, Israel, Marekani na Uingereza ziliituhumu Iran kuhusika na mpango huo. Tehran ilikanusha vikali madai hayo, huku Waziri wa Mambo ya Nje wa Iran, Abbas Araqchi, akisema kuachiwa kwa washukiwa hao kunatoa picha ya udhaifu wa tuhuma zilizokuwa zikitolewa dhidi yao.

Mvutano huo unakuja miezi kadhaa baada ya Iran kuikosoa Uingereza kwa kuruhusu Marekani kutumia Kambi ya Anga ya RAF Fairford kufanya mashambulizi dhidi ya maeneo ya Iran. Wakati huo, Tehran ilisema inahifadhi haki ya kulenga vituo vya kijeshi vinavyotumiwa na Marekani.