KUNDI LA IRINGA VISION LASHEREHEKEA MIAKA MIWILI KWA KUTOA MSAADA KITUO CHA WATOTO YATIMA CHA HURUMA CENTER

NA MATUKIO DAIMA MEDIA, IRINGA

KUNDI la Iringa Vision

limeadhimisha miaka miwili tangu kuanzishwa kwake kwa kutoa msaada wa chakula na fedha kwa watoto wanaolelewa katika Kituo cha Watoto Yatima cha Huruma Centre, ikiwa ni sehemu ya juhudi zake za kusaidia makundi yenye uhitaji katika jamii.

Msaada huo umetolewa na wanachama wa kundi hilo kwa lengo la kushirikiana na watoto wa kituo hicho katika maadhimisho ya miaka miwili ya Iringa Vision Group, sambamba na kuonesha upendo na kuwapa faraja watoto hao.

Akizungumza wakati wa kukabidhi msaada huo, Mwenyekiti wa Iringa Vision Group, Eliza Chusi, alisema chakula na fedha zilizotolewa katika kituo hicho zimepatikana kupitia michango ya wanachama wa kundi hilo.

Chusi alisema wanachama walikubaliana kutumia sehemu ya maadhimisho yao kuwakumbuka watoto yatima badala ya kujikita katika sherehe pekee. Alisema hatua hiyo imelenga kuonesha kuwa jamii ina wajibu wa kuwajali na kuwasaidia watu wanaokabiliwa na changamoto mbalimbali za maisha.

Kwa mujibu wa mwenyekiti huyo, miaka miwili ya uwepo wa Iringa Vision Group imekuwa na mafanikio makubwa katika kuimarisha ushirikiano na mshikamano miongoni mwa wanachama wake.

Alisema maadhimisho hayo yamewapa nafasi ya kutafakari walikotoka, mafanikio waliyopata na namna wanavyoweza kuendelea kutumia umoja wao kuleta manufaa kwa wanachama pamoja na jamii inayowazunguka.

“Tumetoa msaada wa chakula na fedha kwa watoto wa Kituo cha Huruma Centre. Msaada huu umetokana na michango ya wanachama wetu kwa ajili ya kuadhimisha miaka miwili tangu kuanzishwa kwa kundi letu,” alisema Chusi.

Mwenyekiti huyo aliishukuru Huruma Center kwa kuendelea kuwalea na kuwahudumia watoto yatima, akisema jukumu la kuwasaidia watoto hao halipaswi kuachiwa viongozi na walezi wa kituo pekee.

Alisema wananchi, wafanyabiashara, taasisi mbalimbali na makundi ya kijamii wanapaswa kushirikiana kuhakikisha watoto wanaoishi katika mazingira yenye changamoto wanapata mahitaji muhimu, malezi bora na matumaini ya kufikia malengo yao.

Chusi alitoa rai kwa jamii kuendelea kuwakumbuka watoto yatima, wajane na wazee wasiojiweza kwa kuwapatia misaada kulingana na uwezo wao.

Alisema baadhi ya watu katika makundi hayo wanakabiliwa na changamoto nyingi, hivyo wanahitaji faraja, upendo na msaada wa jamii ili waweze kuendesha maisha yao kwa matumaini.

Aidha, alieleza kuwa msaada si lazima uwe mkubwa, bali hata mchango mdogo unaotolewa kwa moyo wa upendo unaweza kuleta mabadiliko katika maisha ya mtu mwenye uhitaji.

Alisema Iringa Vision Group itaendelea kuyajali makundi yenye uhitaji na kushiriki katika shughuli mbalimbali zinazolenga kuisaidia jamii.

“Tunatoa rai kwa jamii kuendelea kuwakumbuka watoto yatima, wajane na wazee wasiojiweza. Sisi kama Iringa Vision Group tutaendelea kuyajali makundi haya na kutoa msaada pale tutakapopata nafasi ya kufanya hivyo,” alisema Chusi.

Kwa upande wake, Katibu wa Iringa Vision Group, Nevice Katindasa, alisema kundi hilo lina wanachama zaidi ya 54 ambao wameunganishwa kwa lengo la kusaidiana wakati wa shida na raha.

Katindasa alisema tangu kuanzishwa kwa kundi hilo, wanachama wameendelea kushirikiana katika masuala mbalimbali yanayowahusu, huku wakihakikisha kuwa umoja wao unaleta manufaa pia kwa wananchi wengine.

Alisema Iringa Vision Group halikuanzishwa kwa ajili ya maslahi ya wanachama pekee, bali lina dhamira ya kushirikiana na jamii katika kutoa msaada kwa makundi yenye uhitaji, yakiwamo ya watoto yatima.

Katibu huyo alisema kutoa msaada kwa Huruma Center

ni sehemu ya utekelezaji wa malengo ya kundi hilo na kwamba wanachama wataendelea kuandaa shughuli nyingine za kijamii kulingana na mahitaji na uwezo wao.

“Dhamira ya kundi letu ni kusaidiana wakati wa shida na raha, lakini pia kusaidia jamii. Tunapopata nafasi na uwezo wa kuwafikia watoto yatima au watu wengine wenye uhitaji, tunafanya hivyo kwa moyo mmoja,” alisema Katindasa.

Aidha, Katindasa aliwakaribisha wananchi wengine kutoka maeneo mbalimbali ndani ya Mkoa wa Iringa kujiunga na kundi hilo ili kuongeza nguvu ya ushirikiano na kupanua wigo wa shughuli zake.

Alisema kuongezeka kwa wanachama kutasaidia kuimarisha mshikamano na kuwezesha kundi kuwafikia watu wengi zaidi wanaohitaji msaada.

Katindasa alisema milango ya Iringa Vision Group iko wazi kwa wananchi wenye nia njema na utayari wa kushirikiana na wengine wakati wa matatizo na furaha.

Aliongeza kuwa mshikamano ni msingi muhimu wa maendeleo ya jamii, kwa sababu unapunguza changamoto zinazoweza kumlemea mtu mmoja na kujenga moyo wa kujitolea.

Kuwa maadhimisho hayo ya miaka miwili yamekuwa na ujumbe wa kuhimiza upendo, mshikamano na uwajibikaji wa jamii kwa watoto yatima pamoja na makundi mengine yenye uhitaji.

Viongozi wa kundi hilo wameahidi kuendeleza umoja uliopo miongoni mwa wanachama na kuhakikisha Iringa Vision Group inaendelea kuwa sehemu ya jitihada za kuisaidia jamii ya Mkoa wa Iringa.

Kwa upande wake Rahabu Gavile akishukuru kwa niaba ya mkuu wa kituo hicho mchungaji Upendo Sanga alisema mchango huu ni mkubwa na kuomba jamii kuendelea kusaidia kituo hicho .

Alisema kituo kina zaidi ya watoto 90 na kuwa kwa sasa watoto wengi wapo masomoni na waliobaki wanaendelea na masomo katika shule ya kituo hicho.

TAZAMA TUKIO ZIMA HAPA