MLELE, KATAVI — 29 Agosti 2026.
Serikali imetenga Sh bilioni 4.354 katika mwaka wa fedha 2026/27 kwa ajili ya kuboresha Kituo cha Mafunzo ya Kijeshi Mlele, huku ikipanga kukibadilisha kuwa Chuo cha Mafunzo ya Jeshi la Uhifadhi kitakachofanya kazi mwaka mzima. Waziri wa Maliasili na Utalii, Mhe. Dkt. Ashatu Kijaji, alitoa kauli hiyo jana, Agosti 29, 2026, katika Kituo cha Mafunzo ya Kijeshi Mlele, mkoani Katavi, wakati akifunga rasmi mafunzo ya awali ya kijeshi kwa askari wapya 328 wa TFS.
Dkt. Kijaji alisema hatua hiyo inalenga kujenga mfumo endelevu wa mafunzo unaozingatia viwango vya kitaifa na kimataifa. Alisema fedha hizo zitatumika kuboresha miundombinu ikiwemo malazi, madarasa, maeneo ya mafunzo, sehemu za chakula na jiko la kisasa, ili Mlele iwe sehemu muhimu ya kujenga uwezo wa Jeshi la Uhifadhi.
Mkuu wa Kituo cha Mafunzo ya Kijeshi Mlele, Mhifadhi Mwandamizi Samuel Msuva, alisema kituo hicho tayari kina msingi wa mafunzo ya nadharia na vitendo, hivyo hatua ya kukiendeleza kuwa chuo itaimarisha uwezo wa kutoa mafunzo endelevu kwa wahifadhi.
Mabadiliko hayo pia yatahusisha upanuzi wa mtaala ili kuendana na mazingira halisi ya kazi. Miongoni mwa maeneo mapya yanayolengwa ni mafunzo ya uokoaji majini, huku Serikali ikiridhia kujengwa kwa bwawa la kuogelea lenye ukubwa wa mashindano ya Olimpiki kwa ajili ya mafunzo hayo.
Akizungumza katika hafla hiyo, Dkt. Kijaji alisema kati ya mwaka 2023 na 2026, Wizara ilipata vibali vya kuajiri maafisa na askari 2,248, huku katika mwaka wa fedha uliopo ikiruhusiwa kutenga bajeti ya kuajiri wengine 649.Kwa mujibu wa Waziri, ongezeko hilo la nguvu kazi linaongeza umuhimu wa kuwa na mfumo endelevu wa mafunzo kwa Jeshi la Uhifadhi.
Mabadiliko ya Mlele yanatarajiwa kutoa mazingira bora ya mafunzo na fursa ya watumishi kuendelea kujenga uwezo baada ya ajira. Kwa Serikali, ni uwekezaji katika nguvu kazi; na kwa Jeshi la Uhifadhi, ni hatua ya kutoka kwenye mfumo wa mafunzo ya vipindi kwenda kwenye mfumo wa chuo unaolenga kuandaa wahifadhi kwa mahitaji ya sasa na changamoto zijazo.
0 Comments