Ngalawa saba zitachuana vikali katika mbio za kasi na ufundi zinazotarajiwa kufanyika kwenye Ufukwe wa Serena.
Mbio hizo za ngalawa zinabeba msisimko mkubwa wa kuhitimisha Tamasha la 29 la Kimataifa la Filamu la Nchi za Jahazi (ZIFF) kwa mwaka huu wa 2026.
Mtendaji Mkuu wa ZIFF, Joseph Mwale, amethibitisha kuwa ushindani huo utazikutanisha ngalawa zenye majina makubwa ikiwemo Azam Media, UNICEF, UN WOMEN, Fish Market, BATISTA, WIOMSA, na COMNET, ambapo mabaharia watachuana kuanzia ufukweni hapo, kuzunguka baharini na kurejea nchi kavu huku washindi wakiondoka na zawadi nono za fedha taslimu.
Kihistoria na kitamaduni, mbio za ngalawa zimekuwa kielelezo kikuu cha maisha, ukakamavu na urithi wa Waswahili wa mwambao ambao wametumia vyombo hivi kwa karne nyingi katika uvuvi na usafiri.
Kuingizwa kwa mashindano haya kama kilele cha tamasha kupitia jukwaa la Wanawake na Vijijini (Women Panorama) kunalenga kuhuisha mchezo huu wa asili na kuupa sura ya kisasa inayovutia watalii na wenyeji.
Tukio hili la kasi na ufundi majini halimalizi tu tamasha kwa burudani, bali linaweka msisitizo mkubwa katika agenda ya mashindano yenyewe kama nguzo inayounganisha jamii, huku ufukwe wa Serena ukigeuka kuwa uwanja wa mayowe, shangwe na ushindani wa kweli wa baharini.
 |
| Mtendaji Mkuu wa ZIFF, Joseph Mwale |
0 Comments