KIPENZI ASHAURI MAMBO MATATU DOREFA, ATAKA SOKA LICHEZWE WILAYANI

Na Hamida Ramadhan, Matukio Daima Media Dodoma

Mwenyekiti wa zamani wa Soka Mkoa wa Dodoma,(DOREFA) Nassoro Kipenzi ameshauri mambo matatu kwa Chama cha Soka Mkoani Dodoma ikiwemo kuhakikisha soka linachezwa wilayani.

Kipenzi ametoa kauli hiyo leo Machi 28,2026 wakati akizungumza katika Mkutano Mkuu wa Chama cha Soka Mkoa wa Dodoma (DOREFA) 

Kipenzi ambaye aliiongoza Dorefa kwa miaka 8 kuanzia mwaka 2008-2016 na kumwachia Mulamu Ng'ambi ambaye aliongoza mpaka mwaka 2020 na kumwachia Mwenyekiti wa sasa Aden Mohammed.

Mwenyekiti huyo Mstaafu ambaye alikuwa mgeni rasmi katika Mkutano huo, amesema licha ya mafanikio ambayo imeyapata Dorefa inatakiwa kuendelea kusisitiza soka kuchezwa Wilayani.

"Nilienda Wilaya ya Chamwino kule nilikuta soka linachezwa sasa hii iwe kote soka lichezwe ili kutoa nafasi ya vipaji kuonekana,"amesema Kipenzi.

Pia ameshauri kuendelea kuhakikisha inazilinda klabu za Dodoma Jiji inayoshiriki Ligi Kuu na Gunners inayoshiriki Championship kuhakikisha zinaendelea kufanya vizuri.

Vilevile ameshauri kuendelea kuufanya Mkoa wa Dodoma kuwa kimbilio kwa klabu zingine ambazo zinautumia uwanja wa Jamhuri kama uwanja wa nyumbani.

"Dodoma imekuwa kimbilio hapa tuna Mtibwa Sugar na Tanzania Prisons zinautumia kama uwanja wa nyumbani endeleeni kuzipa ushirikiano ili ziendelee kuutumia kama uwanja wa nyumbani,"amesema Kipenzi.

ADEN AAHIDI MAKUBWA DODOMA

Mwenyekiti wa Chama cha Soka Mkoa wa Dodoma (DOREFA) Aden Mohammed ameahidi makubwa zaidi kwa soka la Mkoa wa Dodoma ikiwemo kuweka mazingira rafiki kwa klabu zinazoutumia uwanja wa Jamhuri kama uwanja wa nyumbani.

Aden ambaye ni Mjumbe wa Kamati ya Utendaji ya TFF na Mjumbe wa Kanda namba 4 inayojumisha Mikoa ya Singida,Dodoma,Shinyanga na Simiyu amesema wanafurahi kwa jinsi ambayo Mkoa wa Dodoma umekuwa na timu nyingi za Ligi Kuu,Dodoma Jiji,Mtibwa Sugar na Tanzania Prisons.

Amesema Dorefa itaendelea kuweka mazingira rafiki na wezeshi ili klabu hizo ziendelee kuutumia uwanja wa Jamhuri kama uwanja wa nyumbani kwa kuhakikisha zinafanya vizuri.

"Niwaahidi wana Dodoma, Dorefa itaendelea kuhakikisha soka linachezwa kuanzia ngazi ya chini mpaka ya juu lengo vipaji vizidi kuonekana,"amesema Aden.