Na Fadhili Abdallah,Kigoma
Umoja wa Wazuoni wa kiislam mkoani Kigoma wamelaani matamko mbalimbali yanayotolewa na makundi ya watu mbalimbali wakiwemo wanasiasa na viongozi wa dini na wanaharakati yanayolenga kuligawa taifa lakini pia kutoa maneno ya kejeli kwa Rais Samia na familia yake.
Kiongozi wa Umoja huo wa wanazuoni mkoa Kigoma, Zuberi Mabie alisema hayo akizungumza na waumini wa kislam katika msikiti wa Ansaar Sunna Ujiji mjini Kigoma na kubainisha kuwa Wazuoni wa kiislam hawakubaliaani na hatua zozote zinazotaka kuchukuliwa na vijana na wanaharakati kuvuruga Amani ya nchi kwa kile wanachoeleza kudai haki.
Alisema kuwa wanasikitishwa na vitendo vya mauaji vilivyofanywa na vikosi vya ulinzi na usalama na kupelekea kupoteza maisha ya Watu mbalimbali na kwamba ni jambo baya lililotokea na kwamba wanaunga mkono kitendo cha Rais Samia kuunda tume kuchunguza machafuko yaliyotokea Oktoba 29 mwaka huu.
Kwa upande wake Mjumbe wa Umoja huo wa mkoa Kigoma, Shukuru Kondo ambaye pia ni Katibu wa Almarid mkoa Kigoma alisema kuwa wanatoa pole kwa vifo vilivyotokea wakati wa vurugu za Oktoba 29 ambapo pia mali nyingi za thamani kubwa za watu viliharibiwaa na kwamba hali hiyo inaathiri kwa kiasi kikubwa hali ya uchumi wa nchi.
Kondo alisema kuwa matukio hayo yameleta athari kubwa kwa kila Mtanzania na kwamba hawataki kuona hali hiyo inajirudia na kulaani kauli zozote zinazoashiria kwamba hali hiyo itajirudia Tarehe 9 Desemba mwaka huu ambapo wametoa tamko la kuwataka watanzania wote kulaani wanaotoa matamko hayo na kutokubali kushiriki kwenye jambo hilo.
Mjumbe mwingine wa kati hiyo, Sheikh Haroon Shaharawi ambaye pia ni Naibu Katibu wa kamati ya maridhiano ya kidini mkoa Kigoma alisema kuwa hawakubaliani na matamko yanayolengwa kuvuruga Amani ya nchi, kumdhalilisha Rais wa nchii lakini pia kuleta ubaguzi na utengano kwa Watanzania hivyo ametaka matamko hayo yalaaniwe kwa nguvu.
Mwisho.
0 Comments