Na Chausiku Said
Matukio Daima Mwanza.
Katibu Tawala wa Mkoa wa Mwanza, Elikana Balandya, amewataka wahitimu wa Taasisi ya Uhasibu Tanzania (TIA) Kampasi ya Mwanza kuchangamkia fursa za kiuchumi zinazopatikana katika mkoa huo, ili kuleta maendeleo katika taifa.
Hayo ameyabainisha Jana Novemba 28, 2025 wakati akihutubia katika mahafali ya 23 ya chuo hicho yaliyofanyika jijini hapa na kueleza kuwa ni muhimu Kuchangamkia Fursa mbalimbali zilizopo.
Balandya alisema kuwa wahitimu wanapaswa kutumia elimu waliyoipata kuwa chachu ya mabadiliko, hasa katika maeneo yenye fursa nyingi za kiuchumi kama vile ufugaji wa samaki, uvuvi, na kilimo, ambayo ni baadhi ya rasilimali muhimu zinazopatikana mkoani Mwanza.
"Mkoa wa Mwanza una fursa nyingi za kiuchumi. Wahitimu mkitumia vyema elimu yenu, mtakuwa na nafasi nzuri ya kuchangia katika maendeleo ya taifa letu," alisema Balandya.
Mtendaji Mkuu wa TIA, Prof. William Pallangyo, alisema kuwa chuo hicho kimeendelea kukua kwa kasi, huku idadi ya wanafunzi ikiwa inaongezeka mwaka hadi mwaka. Alisema kuwa mwaka 2012, Kampasi ya Mwanza ilianza na wanafunzi 381, na hadi mwaka 2024, idadi ya wanafunzi imefikia 1,328. Hii inaonesha kuongezeka kwa uhitaji wa elimu ya uhasibu na usimamizi wa biashara.
"Ongezeko hili linathibitisha kuwa TIA inatoa elimu bora inayokidhi mahitaji ya soko. Chuo kimejizatiti kuwaandaa wahitimu walio na ufanisi katika uhasibu na usimamizi wa biashara,” alisema Prof. Pallangyo.
Prof. Pallangyo alizungumzia pia hatua zinazochukuliwa na chuo kuboresha miundombinu ya kisasa. Alisema kuwa ujenzi wa hosteli za wanafunzi umefikia asilimia 70 na unatarajiwa kugharimu shilingi bilioni 7.2, huku ujenzi wa canteen ukikamilika mwaka 2026 kwa gharama ya shilingi milioni 351.
"Miundombinu hii itaendelea kuboresha mazingira ya masomo na huduma za wanafunzi, ili kuhakikisha wanafunzi wanapata huduma bora na mazingira ya kujifunzia ya kisasa," alisema.
Prof. Pallangyo alitoa shukrani kwa Rais Samia Suluhu Hassan kwa kuongeza fedha za mikopo ya elimu ya juu, hatua iliyowezesha ongezeko la wanufaika wa mikopo katika Kampasi ya Mwanza kutoka 741 mwaka 2024 hadi 1,299 mwaka 2025.
"Kwa msaada huu wa serikali, wanafunzi wengi wanapata mikopo inayowawezesha kuendelea na masomo yao. Hii ni hatua muhimu katika kuhakikisha kuwa hakuna mwanafunzi anayeachwa nyuma kutokana na changamoto za kifedha," alisema.
Katika kuboresha utoaji wa elimu, TIA Mwanza imeanzisha kozi mpya ya Usimamizi wa Biashara, kuanzia ngazi ya cheti hadi astashada. Kozi hii itatoa fursa kwa wahitimu kujiandaa vyema kwa ajira katika sekta ya biashara na ujasiriamali, huku ikijibu mahitaji makubwa ya soko la ajira.
Prof. Pallangyo pia alieleza kuwa TIA Mwanza imefanikiwa kuchapisha utafiti 21 katika masuala ya uchumi, fedha, na uongozi, ikiwa ni sehemu ya mchango wa chuo katika kuboresha mifumo ya uchumi na uongozi nchini. TIA inaendelea kuchangia katika maendeleo ya taifa kupitia tafiti na mchango wake katika sekta ya elimu.
Jumla ya wahitimu 1,035 wametunukiwa vyeti katika ngazi ya cheti cha awali, astashada na shahada katika mahafali ya 23 ya Taasisi ya Uhasibu Tanzania (TIA) Kampasi ya Mwanza.
0 Comments