Na Matukio Daima Media
Katika anga la uongozi na harakati za kijamii, kuna watu wachache wanaong'aa si kwa sababu ya majina yao tu, bali kwa kazi zao, moyo wao wa kujitolea na utendaji wao uliotukuka.
Mmoja wa watu hawa ni Mhandisi Fatma Rembo, ambaye kwa sasa ni mjumbe wa Kamati ya Utekelezaji ya Umoja wa Wanawake Tanzania (UWT) Taifa.
Kazi na juhudi zake mkoani Iringa zimemfanya kuwa nyota inayong’aa mchana, jambo ambalo si la kawaida, lakini linaashiria upekee wake katika uongozi na huduma kwa jamii.
Mhandisi Fatma Rembo ameonesha uongozi wa mfano ndani ya jumuiya ya UWT kwa kuwa mstari wa mbele katika kutetea haki, maendeleo na ustawi wa wanawake, si kwa maneno tu bali kwa vitendo.
Ameshirikiana kwa karibu na wanawake wenzake kuhakikisha kwamba sauti zao zinasikika na mahitaji yao yanashughulikiwa kikamilifu.
Anaamini katika umoja na mshikamano, akiamini kuwa wanawake wakishikamana wanaweza kufanikisha mabadiliko chanya katika jamii nzima.
Kinachomtofautisha zaidi Mhandisi Rembo ni mtazamo wake wa kujitolea bila kubagua. Amejipambanua kama kiongozi anayejali watu wote bila kujali itikadi, hadhi au hali ya mtu katika jamii.
Katika kuadhimisha Siku ya Mtoto wa Afrika, mchango wake ulikuwa wa kipekee, ambapo alihakikisha watoto walioko kwenye mazingira magumu wanapata faraja, msaada na matumaini mapya ya maisha bora.
Alikuwa kiongozi wa vitendo, akitoa misaada, lakini pia akizungumza nao kwa lugha ya matumaini.
Misaada yake haijaishia kwenye makundi ya watoto pekee ametoa msaada mkubwa kwa jamii mbalimbali zenye changamoto, ikiwemo wajane, watu wenye ulemavu na familia zisizojiweza.
Mfano wa wazi ni msaada alioutoa kwa mjane Maria Ngoda, ambaye alikuwa anakabiliwa na changamoto kubwa ya makazi.
Mhandisi Rembo alihakikisha kuwa mama huyu anapata msaada wa makazi bora na heshima kama mwanadamu hili ni tukio ambalo liligusa mioyo ya wengi na kuibua hisia za mshikamano katika jamii nzima ya Iringa.
Aidha, uongozi wa Mhandisi Fatma Rembo umejikita katika ushawishi wa maendeleo endelevu.
Amekuwa akihamasisha wanawake kujiunga katika vikundi vya ujasiriamali, kushiriki katika masuala ya uongozi na pia kutumia fursa za elimu ili kujiinua kimaisha.
Anawaamini wanawake na uwezo wao, na anawahimiza wajitokeze katika nafasi mbalimbali za uongozi ndani ya jamii na taifa kwa ujumla.
Kwa ujumla, Mhandisi Fatma Rembo ni mfano wa kuigwa kwa viongozi wanawake nchini. Ni kiongozi anayetumia nafasi yake kuleta mwanga kwa wengine, anayesimama na wanyonge, na mwenye ndoto kubwa ya kuona wanawake wakijikwamua kiuchumi na kijamii.
Katika macho ya wengi, yeye si kiongozi wa kawaida, bali ni nyota inayong’aa hata wakati wa mchana ishara ya kuwa nuru yake haizimiki hata katika mwanga wa kawaida.
0 Comments