ELIMU YA MIKOPO ITOLEWE KWA WINGI KWA WANAWAKE KUEPUKA MIKOPO UMIZA

 

NA SHAMILA RAJABU,MATUKIO DAIMA

Kutokana na wanawake wengi kukopa mikopo na kushindwa kurejesha na kujikuta wanaingia katika madhira ya kunyang'anywa mali zao walizoweka dhamana na taasisi mbali mbali za mikopo,Mhadhiri wa chuo kikuu cha Iringa Tuli Tweve amewashari akinamama kupata elimu ya fedha kabla ya kuchukua mikopo.

Tweve ameyasema hayo leo  katika kipindi cha mwanamke kwanza kinachorushwa na Matukio Daima na kubainisha kuwa ukosefu wa elimu ya fedha huleta madhara kwa wanawake wanaokopa bila kuwa na matumizi sahihi ya fedha wanazokopa na kushindwa kurejesha kwa sababu fedha hizo haziendi kutumika katika kuingiza kipato.

Alisema kuwa wengi wao hujiingiza katika mikopo ya kausha damu yenye riba kubwa na kusababisha kushindwa kurejesha mikopo hiyo na kujikuta wanasambaratisha familia zao.

 Ikiwa leo ni siku ya kilele cha maadhimisho ya siku ya mwanamke duniani iliyobeba kauli mbiu ya ‘’Wanawake na Wasichana Tuimarishe Haki, Usawa, na Uwezeshaji” ambayo kitaifa yanafanyika Arusha huku Dkt Samia Suluhu Hassan akiwa mgeni rasmi katika maadhimisho hayo.

“Moja kati ya changamoto kubwa ambayo inawakumba wanawake kwa sasa ni suala la mikopo ya kausha damu na wengi wao hawana elimu ya kutosha kuhusiana na mikopo ya kausha damu hivyo hii inawafanya kuweza kujiingiza kwenye mikopo ambayo haizalishi matokeo yake mikopo inakuwa misiba kwenye familia zao kwasababu wengi wanachukua mikopo hiyo bila kuwa na malengo”

Mhadhiri huyo ameongeza kuwa wanawake wasilaumiwe sana kuhusiana na suala la mikopo ya kausha damu kwasababu chazo cha wakina mama wengi kujiingiza katika mikopo hii ni hali ambayo inatokea kwa kufikiri kuwa mikopo hiyo inaweza kutumika hata kwenye kufanyia starehe nyingine badala ya kuizalisha tena pesa hiyo.

“Kumekuwa na fikra tofauti tofauti kuhusiana na mikopo ya kina mama na jambo kubwa ni sababu inayokupelekea wakina mama kuingia katika mikopo hiyo ambayo ni tamaa ambapo wakina mama wengi tunapenda kuwa kama wengine jambo linalopelekea kutaka mambo kwa haraka na kusahau kuwa maisha yanataka vitu viende kwa hatua” 

Pia ameeleza kuwa elimu pekee inayotakiwa kutumika kwa sasa ili kuwasaidia wanawake kuepukana na changamoto ya mikopo ya kausha damu ni elimu ya uchumi ambayo itawasaidia wanawake kukopa kwa malengo.“Sisi wanawake tunatakiwa kupata elimu ya kiuchumi ambayo itakuwa na uwezo wa kutufanya kuweza kuzalisha pesa zaidi hata kama ni pesa za mikopo ambapo itatusaidia kuachana na kuchukua pesa za mikopo zisizo na malengo”

Hata hivyo ameongeza kuwa wanawake wajitokeze kuchukua mikopo ambayo huwa inatolewa na taasisi maalumu pia mikopo ya halmashari ambapo serikali imewekeza kwa kiwango kikubwa katika kusaidia wanawake na kina mama.