Mdau wa maendeleo Kilolo mkoani Iringa Aidan Mlawa ametaka Kila mtanzania kuendelea kushiriki kuhamasisha wananchi kushiriki kikamilifu katika uchaguzi wa serikali za mitaa.
Kuwa hamasa inahitajika kuhamasisha kila mmoja kutambua umuhimu wa kura yao katika kuchagua viongozi wa ngazi ya chini.
Mlawa amesema kuwa uchaguzi wa serikali za mitaa sio jukumu la viongozi wa vyama au serikali pekee, bali ni wajibu wa kila mwananchi kuhakikisha kwamba anaelewa umuhimu wa kushiriki na kumhamasisha mwenzake kufanya hivyo.
"Tunapoelekea uchaguzi huu, ni muhimu kuona kwamba watu waliojiandikisha kwenye daftari la mkazi wanapiga kura kwa wingi, hali itakayosaidia kupata viongozi bora wa mitaa na vijijini ambao ni msingi wa maendeleo ya taifa letu"
Alisema maendeleo ya taifa letu yanategemea kwa kiasi kikubwa serikali za mitaa, ambazo zinahusisha viongozi wanaowakilisha wananchi katika ngazi za msingi.
Kwani alisema serikali kuu hujengwa kwa kushirikiana na serikali za mitaa, na hivyo kushiriki kwenye uchaguzi huu ni sehemu muhimu ya kutimiza wajibu wa kidemokrasia.
Mlawa alisema Kwa maana hiyo, kila mwananchi ana nafasi ya kuhakikisha kwamba tunapata viongozi ambao sio tu wanatetea maslahi ya jamii, bali pia wana dhamira ya kuleta mabadiliko chanya.
"Viongozi wa mitaa ndio wanajua matatizo ya karibu ya wananchi na wanaweza kushiriki kikamilifu katika kuyatatua, kwa kushirikiana na serikali kuu"
Alisema kwa bahati mbaya, kuna baadhi ya wananchi ambao hawatilii maanani uchaguzi wa serikali za mitaa na kuona kama hauna umuhimu.
Alisema watu hawa wanapaswa kutambua kuwa serikali kuu haiwezi kuendelea bila serikali za mitaa, ambazo ndizo zina jukumu la kusimamia shughuli mbalimbali za maendeleo na kutoa huduma kwa wananchi.
"Uchaguzi wa serikali za mitaa unapaswa kuzingatiwa kama sehemu muhimu ya kuwajengea wananchi msingi wa uongozi wenye uwajibikaji na ushirikiano, ambao utaleta manufaa kwa jamii nzima"
Alisema kuwa miongoni mwa changamoto zinazoweza kuathiri uchaguzi huu ni upotoshaji kutoka kwa baadhi ya wanasiasa, hasa wale wa upinzani, ambao mara nyingi wanakosoa na kubeza juhudi zinazofanywa na serikali.
Wapo wanasiasa wa upinzani ambao wanachukulia uchaguzi huu kama fursa ya kukosoa kila hatua inayochukuliwa na serikali, hata zile zinazolenga kuleta maendeleo kwa wananchi.
Wakati mwingine wanapinga maendeleo ya serikali bila sababu za msingi, na hivyo basi ni muhimu kwa wananchi kutokubali kushawishiwa na watu wa aina hii.
Alisema wananchi wana jukumu la kuangalia maslahi mapana ya taifa kwa kuunga mkono juhudi za maendeleo zinazofanywa na serikali ya awamu ya sita chini ya uongozi wa Rais Samia Suluhu Hassan.
Kuwa Tanzania imepiga hatua kubwa katika nyanja nyingi, ikiwemo afya, elimu, miundombinu, na ustawi wa jamii kwa ujumla.
Alisema kuwa mafanikio haya hayajaja kwa bahati mbaya ni matokeo ya kazi kubwa na mipango kabambe iliyowekwa na serikali zote zilizopita hadi kufikia serikali ya awamu ya sita.
Hata wale ambao wanakosoa leo ni wanufaika wa maendeleo haya, lakini wameamua kufunga macho na kutoona ukweli.
Mlawa anasema kuwa serikali ya awamu ya sita imejipanga kuhakikisha kuwa inawaletea wananchi maendeleo endelevu kwa kushirikiana na serikali za mitaa na vijijini.
Hivyo ni muhimu kuacha tabia ya kubeza juhudi hizi na badala yake kuendelea kushirikiana kwa ajili ya maslahi ya taifa.
Katika serikali ya awamu ya sita, Rais Samia Suluhu Hassan ameonyesha dhamira ya dhati ya kuboresha maisha ya Watanzania kupitia sera madhubuti na mipango thabiti ya maendeleo.
Serikali hii imefanya mambo makubwa katika kuboresha huduma za kijamii, kama vile ujenzi wa miundombinu ya barabara, huduma za afya na elimu, na ujenzi wa vituo vya afya karibu na wananchi.
Alisema kuwa katika kipindi kifupi, tumeshuhudia miradi mikubwa ya kimkakati inayofanywa kwa lengo la kuimarisha uchumi wa taifa na kuboresha maisha ya wananchi wa kawaida. Hii ni ishara ya serikali inayowajali wananchi na yenye malengo ya muda mrefu.
Alisema kuwa ushirikiano kati ya serikali ya awamu ya sita na wananchi ni nguzo muhimu ya kufanikisha maendeleo.
Hivyo kila mwananchi ana jukumu la kushiriki katika uchaguzi wa serikali za mitaa ili kuhakikisha kuwa tunachagua viongozi waaminifu, wenye weledi na walio tayari kushirikiana na serikali kuu.
"Ni vema Kila mmoja wetu ana nafasi muhimu katika mchakato huu, na ushiriki wetu unadhihirisha uzalendo na dhamira ya kuijenga Tanzania bora"
Alisema kuwa kwa njia hii tu tutaweza kupata viongozi wenye uthubutu wa kusimamia na kutekeleza mipango ya maendeleo kwa ufanisi.
Wakati huu wananchi wanahitaji kuwa macho na kutokubali kupotoshwa na hoja zinazotolewa na baadhi ya wanasiasa ambao lengo lao kuu ni kukosoa bila kutoa mawazo mbadala yenye kujenga.
Mlawa alisema wananchi hawapaswi kuyumbishwa na watu ambao wana ajenda binafsi, bali wanapaswa kuzingatia maslahi ya taifa kwa kuunga mkono mipango na sera zinazolenga kuboresha maisha yao.
"Hii ni fursa ya kipekee kwa wananchi kutimiza wajibu wao wa kidemokrasia kwa kuchagua viongozi wa mitaa wanaoendana na matarajio yao ya maendeleo"
Kuwa serikali kuu inategemea serikali za mitaa katika kutekeleza sera zake, wananchi wanapaswa kujitokeza kwa wingi siku ya uchaguzi na kuwachagua viongozi wanaojali maslahi ya jamii na taifa kwa ujumla.
Aidha alisema kuwa Serikali za mitaa ni sehemu muhimu ya muundo wa serikali kwa sababu ndio zinazohusika na kusimamia shughuli za kimaendeleo kwenye ngazi za chini, jambo ambalo linaathiri moja kwa moja maisha ya wananchi wa kawaida.
Mlawa alisema ni wajibu wa kila mmoja wetu kuhakikisha tunashiriki kikamilifu katika uchaguzi huu.
"Ni muhimu kwa wananchi wote kutambua kwamba ushiriki wao katika uchaguzi wa serikali za mitaa ni hatua ya msingi katika kuimarisha demokrasia na kujenga taifa lenye viongozi bora na wenye maono"
Kuwa kila mwananchi anapaswa kuwa balozi wa mabadiliko kwa kumhamasisha mwenzake kushiriki katika uchaguzi huu na kuhakikisha kwamba wanajiandikisha na kupiga kura kwa wingi.
Kwani kura yako ni sauti yako, na kupitia sauti hiyo, tunaweza kuleta mabadiliko ya kimaendeleo na kujenga Tanzania yenye amani, mshikamano, na ustawi kwa wote.
"Kwa hivyo tunapokaribia uchaguzi wa serikali za mitaa, tujitokeze kwa wingi na tuwaunge mkono viongozi ambao wana dhamira ya kweli ya kuwatumikia wananchi na kuleta maendeleo tuuendelee kuhamasishana, kujitokeza kwa wingi siku ya kupiga kura, na kuchagua viongozi wanaofaa"
Kuwa serikali makini inategemea viongozi waaminifu na wachapakazi wa ngazi ya chini, ambao watafanya kazi bega kwa bega na serikali kuu.
Uchaguzi wa serikali za mitaa na vijiji utafanyika Novemba 27 mwaka huu.
.jpg)
0 Comments