MWANAHABARI SHALOM AWATAKA VIJANA KUTUMIA MAJUKWAA YA MICHEZO KUAMUA HATMA YA KUWAPATA VIONGOZI BORA

 

Na Matukio Daima media 

Mwanahabari maarufu, Robert Shalom, ametoa rai kwa vijana nchini kutumia majukwaa ya michezo kuhamasishana na kushiriki kikamilifu katika chaguzi zinazokuja ili kuhakikisha wanawapata viongozi bora. 

Shalom alitoa ujumbe huo alipohudhuria hafla ya michezo iliyofanyika mjini Mafinga, ambako pia alipewa heshima ya kugawa zawadi kwa washindi wa mashindano ya mchezo wa pool table.

Katika hotuba yake, Shalom alisisitiza umuhimu wa vijana kufanya kazi kwa bidii na kutumia fursa zilizopo kujiletea maendeleo ya kiuchumi na kijamii. 

Alisema michezo, mbali na kuwa burudani, pia ni jukwaa muhimu kwa vijana kujifunza nidhamu, kujenga mahusiano, na kuhamasishana kuhusu masuala mbalimbali ya kijamii, ikiwemo uchaguzi.

Akizungumzia uchaguzi wa serikali za mitaa unaotarajiwa kufanyika mwezi ujao, Shalom aliwaomba vijana kuwa mstari wa mbele katika kushiriki zoezi hilo.

 Alisisitiza kuwa kushiriki uchaguzi ni haki ya msingi ya kila raia na ni njia muhimu ya kuleta mabadiliko chanya. “Kura yako ndiyo silaha yako. Itumie vyema kuchagua viongozi wanaoweza kuleta maendeleo katika jamii yako,” alihimiza Shalom.

Aidha, aliwakumbusha vijana kuwa mabadiliko ya kweli yanaanza na wao. Aliwasihi kutambua nafasi yao katika kuleta maendeleo na kuhakikisha wanakuwa sehemu ya maamuzi yanayoathiri maisha yao. “Msikubali kubaki nyuma. 

Fursa za maendeleo ziko mikononi mwenu, na pia ninyi ndio wenye uwezo wa kuamua hatma ya taifa letu kwa kuchagua viongozi bora,” alisema.

Hafla hiyo ya michezo iliyohudhuriwa na vijana wengi wa mji wa Mafinga ililenga si tu kuburudisha bali pia kuwaunganisha vijana kupitia michezo na kuwaweka karibu na masuala ya kijamii. 

Mashindano hayo yalimalizika kwa mafanikio makubwa, na washindi walipongezwa kwa juhudi zao.

Kwa kuhitimisha, Shalom aliwahimiza vijana kutoipuuza fursa ya kushiriki uchaguzi wa serikali za mitaa kwa kuwa ni sehemu muhimu ya utekelezaji wa haki za kikatiba.

 Alisisitiza kuwa ushiriki wao hautaishia tu kwenye uchaguzi huu, bali unapaswa kuwa wa kudumu ili kuimarisha uwajibikaji na maendeleo endelevu nchini.

#Kijanajitambue

#ShirikiUchaguzi

#KuraYakoNiMuhimu