SEPTEMBA 27 Kila mwaka Dunia huadhimisha siku ya Utalii ikiwa na lengo la kuhamasisha na kuongeza ufahamu kuhusu umuhimu wa sekta ya utalii, kijamii, kiuchumi, na kitamaduni.
Shirika la Umoja wa Mataifa la Utalii Duniani (UNWTO) ndilo linaongoza maadhimisho haya, ambapo kila mwaka huambatana na kaulimbiu inayolenga kuonyesha mchango wa utalii katika maendeleo ya dunia.
Siku ya Utalii Duniani ilianzishwa rasmi na UNWTO mwaka 1980, miaka mitano baada ya Shirika hilo kuanzishwa. Lengo la UNWTO ni kuendeleza na kukuza utalii ulimwenguni kama nyenzo muhimu ya maendeleo endelevu.
Tarehe 27 Septemba ilichaguliwa kwa sababu ni siku ambayo, mnamo mwaka 1970, Katiba ya UNWTO ilikubaliwa. Tangu wakati huo, kila mwaka nchi wanachama huadhimisha siku hii kwa shughuli mbalimbali za utalii.
Sekta ya utalii ni moja ya sekta kubwa na zinazokua kwa kasi duniani, ikichangia kwa kiasi kikubwa pato la taifa kwa nchi nyingi, hasa zinazoendelea.
Inakadirwa kuwa zaidi ya watu bilioni moja husafiri kwa madhumuni ya utalii kila mwaka, huku utalii ukiwa chanzo kikubwa cha ajira kwa mamilioni ya watu duniani kote.
Siku ya Utalii Duniani inalenga kutoa elimu juu ya namna utalii unavyoweza kuchangia katika maendeleo endelevu.
Sekta hii inatoa ajira si tu kwenye hoteli na migahawa, bali pia kwenye sekta za usafiri, sanaa na ufundi, biashara ndogo ndogo, kilimo, na huduma mbalimbali zinazohusiana na utalii.
Hivyo basi, ina mchango mkubwa katika kupunguza umasikini na kuleta maendeleo katika jamii mbalimbali.
Aidha, utalii husaidia kuimarisha uhusiano wa kitamaduni na kijamii baina ya watu kutoka mataifa tofauti, hivyo kuchangia amani na mshikamano wa kimataifa.
Kwa kutembelea maeneo ya kihistoria na kiutamaduni, wageni hujifunza kuhusu mila na desturi za watu wa maeneo wanayotembelea, jambo linaloimarisha maelewano na kuvunja tofauti za kiutamaduni.
Pamoja na faida nyingi za kiuchumi na kijamii, sekta ya utalii pia ina changamoto zake, hususani katika suala la uharibifu wa mazingira.
Shughuli za utalii zisizosimamiwa vyema zinaweza kusababisha uharibifu wa rasilimali asili, kama vile misitu, vyanzo vya maji, na uoto wa asili.
Hii ni kutokana na ujenzi wa miundombinu kama vile hoteli, barabara, na vivutio vya utalii katika maeneo nyeti ya mazingira.
Aidha, utalii unaweza kuchangia kudhoofisha tamaduni za asili, hasa pale ambapo utamaduni wa kigeni unapopenyezwa kwa nguvu katika jamii za wenyeji. Wenyeji mara nyingi hulazimika kubadilisha njia zao za maisha ili kukidhi mahitaji ya watalii, jambo ambalo linaweza kusababisha kupotea kwa utambulisho wa kitamaduni wa jamii hizo.
Kwa sababu hiyo, kuna umuhimu mkubwa wa kuendeleza utalii endelevu, ambao unaweka mbele hifadhi ya mazingira na tamaduni. Utalii endelevu unalenga kutoa manufaa ya kiuchumi kwa jamii za wenyeji bila kuharibu mazingira wala kuathiri utamaduni wao.
Kila mwaka, UNWTO huja na kaulimbiu tofauti kwa ajili ya kuadhimisha Siku ya Utalii Duniani. Kaulimbiu hizi hulenga kutoa ujumbe mahsusi kuhusu namna bora ya kuendeleza utalii na kujali masuala mbalimbali yanayogusa sekta hiyo.
Kwa mfano, mwaka 2022, kaulimbiu ya Siku ya Utalii Duniani ilikuwa "Utalii na Ajira: Baadaye Bora kwa Wote," ikilenga kuonyesha jinsi sekta ya utalii inavyoweza kusaidia kuunda nafasi nyingi za ajira, hasa kwa vijana na wanawake.
Mwaka 2023, kaulimbiu ilikuwa "Utalii kwa Wote:
Kila Mtu Anahusika," ikilenga kuangazia umuhimu wa kuhakikisha kuwa kila mtu anapata fursa ya kushiriki katika shughuli za utalii bila kujali hali yake ya kimwili, kifedha, au kijamii.
Katika karne ya 21, maendeleo endelevu yamekuwa suala nyeti duniani kote, na sekta ya utalii imekuwa moja ya sekta zinazotilia mkazo dhana hii. Utalii endelevu unalenga kuweka uwiano kati ya ukuaji wa uchumi, uhifadhi wa mazingira, na maendeleo ya kijamii.
UNWTO imetoa mwongozo wa utalii endelevu unaohimiza matumizi bora ya rasilimali za asili, kuzingatia heshima kwa tamaduni za wenyeji, na kuhakikisha kuwa mapato yanayotokana na utalii yananufaisha jamii za wenyeji.
Kwa mfano, katika maeneo kama Serengeti nchini Tanzania, kuna mpango wa kuzuia idadi ya watalii wanaotembelea hifadhi hiyo kwa wakati mmoja ili kulinda mazingira ya wanyama pori na kupunguza athari za shughuli za utalii kwa mazingira.
Mbali na hilo, utalii endelevu unahimiza matumizi ya nishati mbadala katika sekta ya utalii, kama vile matumizi ya majiko rafiki wa mazingira katika hoteli na kambi za watalii, pamoja na kupunguza matumizi ya plastiki ambayo yanachangia uharibifu wa mazingira.
Janga la COVID-19 lililoibuka mwaka 2020 liliathiri sekta ya utalii duniani kote kwa kiasi kikubwa. Nchi nyingi zililazimika kufunga mipaka yao, jambo lililosababisha kupungua kwa idadi ya watalii wa kimataifa.
Hoteli, kampuni za usafirishaji, na vivutio vya utalii vilipata hasara kubwa, huku mamilioni ya watu wakipoteza ajira.
Hata hivyo, baada ya janga hilo kudhibitiwa kwa kiasi fulani, sekta ya utalii imeanza kuimarika tena.
UNWTO imekuwa mstari wa mbele kuhimiza nchi wanachama wake kuchukua hatua za haraka kufufua sekta hiyo, kwa kuzingatia usalama na afya ya watalii.
Siku ya Utalii Duniani ni fursa muhimu ya kutafakari jinsi sekta ya utalii inavyochangia maendeleo ya kijamii, kiuchumi, na kitamaduni ulimwenguni.
Pia pamoja na changamoto zake, utalii ni sekta yenye nguvu ya kuleta mabadiliko chanya, hasa kwa kuzingatia misingi ya maendeleo endelevu.
Hivyo ni ni muhimu kwa nchi mbalimbali kuwekeza katika utalii endelevu, ambao unahifadhi mazingira, unaheshimu tamaduni za wenyeji, na kutoa fursa za kiuchumi kwa wote.
0 Comments