Na Fadhili Abdallah,Kigoma
RAIS Samia Suluhu Hassan anatarajia kufanya ziara ya siku moja mkoani Kigoma Julai 20 mwaka huu ambapo akiwa mkoani humo kiongozi huyo ataweka jiwe la msingi la ujenzi wa reli ya kisasa (SGR) kipande cha sita kutoka Tabora hadi Kigoma yenye urefu wa kilometa 506 katika eneo la Katosho mradi
Waziri wa uchukuzi Profesa Makame Mbarawa akizungumza katika mkutano na waandishi wa habari Jumapili Julai 19 mkoani Kigoma alisema kuwa Raisi Samia ataweka jiwe la msingi katika hafla itakayofanyika Eneo la Katosho Manispaa ya Kigoma Ujiji mkoani humo ambapo pia atafanya uzinduzi wa safari za meli ya Mv.Liemba baada ya kufanyiwa ukarabati mkubwa.
Pamoja na hayo Waziri Mbarawa alisema kuwa akiwa mkoani Kigoma Rais Samia atazindua safari za meli nne za mizigo ambazo kila moja ina uwezo wa kubeba mizigo tani 2500 sambamba na kutembelea mradi wa maboresho ya miundo ya bandari ya Kigma.
 |
| Mkuu wa mkoa Kigoma Balozi Simon Sirro (kulia) akizungumza kwenye mkutano wa Waziri wa uchukuzi Profesa Makame Mbarawa (katikati) akieleza ziara ya Rais Samia Suluhu Hassan mkoani Kigoma Julai 20 mwaka huu |
Waziri huyo wa uchukuzi alisema kuwa kwa miradi hiyo ni sehemu ya utekelezaji dira ya maendeleo ya Taifa ya mwaka 2025/2050 na utekelezaji wake utauweka mkoa Kigoma kama Lango kuu la biashara kuelekea nchi za maziwwa makuu na kuimarisha usafirishaji wa mizigo katika ushoroba wa kati kupitia ziwa Tanganyika kuelekea nchi za ukanda wa maziwa makuu .
Kwa upande wake Mkuu wa mkoa Kigoma,Balozi Simon Sirro alisema kuwa ujenzi wa reli ya SGR na meli kwenye ziwa Tanganyika zitarahisisha usafirishaji wa mizigo kutoka bandari ya Dar es Salaam kuelekea nchi za maziwa makuu kwani kwa sasa kumekuwa na changamoto kubwa ya mizigo kuchukua muda mrefu kutoka Dar es Salaam kuwafikia wateja.
0 Comments