MUUNGANIKO WA KALAMU NA SAUTI ZA WAANDISHI WA HABARI KUTOKA ZANZIBAR NA TANZANIA BARA KUINADI TANAPA

Na. Jacob Kasiri - Mikumi.

Zaidi ya Waandishi wa Habari 20 kutoka vyombo mbalimbali vya habari Zanzibar na Tanzania bara  wakiongozwa na gwiji mkongwe katika tasnia ya habari Visiwani Zanzibar Farouk Karimu kutoka kituo cha ITV waliwasili jana Novemba 28, 2025 katika Hifadhi ya Taifa Mikumi kwa ajili ya ziara ya siku nne (4) kuzinadi Hifadhi za Taifa Mikumi na Milima Udzungwa.

Akiwa katika hifadhi hiyo mwanahabari huyo mkongwe  mwenye sauti ya madaha bw. Farouk Karim alisema, “TANAPA mmetupa heshima kubwa sana ya kutembelea vivutio hivi ili nasisi tutoe mchango wetu wa kuvitangaza ili kuvutia watalii wengi wa ndani na nje ya mipaka yetu”.

“Kitendo hiki kinadumisha muungano wetu, na TANAPA endeleeni kuwa dira ya kuigwa na taasisi nyingine kwani mmedhihirisha kuwa maliasili hizi ni za watanzania wote, hivyo ni jukumu letu sote kuzilinda na kuzitangaza kwa faida ya Tanzania bara na Visiwani”, aliongeza Farouk Karim.

TANAPA inatambua mchango wa vyombo mbalimbali vya habari katika uhamasishaji wa utalii na kutangaza fursa za uwekezaji ndani ya maeneo hayo yaliyohifadhiwa ndio maana inaendelea kuunganisha nguvu katika kuzitangaza na kuhamasisha watanzania kutembelea maliasili zao.

Akiwakaribisha katika hifadhi hiyo Kamishna Msaidizi wa Uhifadhi na Kaimu Mkuu wa Kanda ya Mashariki Fredrick Malisa alisema, “TANAPA inajua kila chombo cha habari kina hadhira yake, hivyo lengo la ziara za aina hii ni kuwafikia watu wengi zaidi ili kuwahamasisha na kutembelea maliasili hizo na kufikia adhima ya serikali ya watalii milioni 8 ifikapo 2030.”

Naye, Kamishna Msaidizi wa Uhifadhi Dkt. Halima Kiwango, Mkuu wa Ofisi Kiunganishi Zanzibar aliyeandaa na kuratibu ziara hiyo alisema,

“Ushirikiano huu wa kuvitangaza vivutio vya utalii na fursa za utalii kupitia vyombo vyote vya habari kutoka Zanzibar na Tanzania bara utaongeza ari na shauku kwa watanzania wa pande zote mbili kutembelea Hifadhi za Taifa na kuongeza idadi ya watalii, na watalii wanapoongezeka inachagiza katika pato la taifa, ajira na kuongeza kasi ya ukuaji wa uchumi kwa taifa na mtu mmoja mmoja.

Ziara hii mujarabu inayoendelea katika Hifadhi za Taifa Mikumi na Milima Udzungwa imejikita katika kuhamasisha utalii wa ndani na kuvutia wawekezaji, inajumuisha waandishi wa habari kutoka Zanzibar na Tanzania bara sanjari na wadau wa mbalimbali wa utalii.