Katika juhudi za kuibua na kutafuta suluhisho la changamoto zinazowakabili walimu wa kike wanaofundisha maeneo ya vijijini, Shirika la ActionAid Tanzania kwa kushirikiana na wadau wa elimu limeandaa kikao kazi maalum jijini Dodoma kujadili ripoti ya utafiti wa kazi zinazofanywa na walimu wakike katika shule za msingi za vijijini Tanzania Bara na Visiwani
Kikao hicho kimewakutanisha maafisa elimu wa shule za msingi na sekondari, walimu wa kike na wa kiume, wawakilishi wa vyama vya walimu kutoka ngazi ya wilaya Tanzania Bara na Zanzibar pamoja na wawakilishi kutoka Wizara ya Elimu, Ofisi ya Rais TAMISEMI, Utumishi na wadau wengine wa elimu kutoka taasisi mbalimbali huku kikihusisha walimu 12 kutoka mikoa 12 nchini ambao walishiriki moja kwa moja katika utafiti huo.
Akizungumza katika kikao hicho Mratibu wa Programu za Vijana kutoka ActionAid Tanzania Arif Fazel alisema lengo kuu la kikao ni kufanya tathmini ya utekelezaji wa mapendekezo yaliyotolewa kupitia utafiti uliofanyika mwaka 2023 ambao uliangazia hali halisi ya mazingira ya kazi ya walimu wa kike walioko vijijini.
"Utafiti huo uliibua changamoto nyingi zinazowakumba walimu ikiwemo ukosefu wa motisha na fursa za kujiendeleza kitaaluma ambapo nafasi nyingi za masomo na mafunzo huwanufaisha walimu wenye vyeo huku walimu wa kawaida wakiachwa nyuma," Amesema.
Pia alieleza kuwa mazingira duni ya kazi ni kikwazo kingine kikubwa ambapo shule nyingi hazina nyumba za walimu hali inayowalazimu waishi mbali na vituo vyao vya kazi na wakati mwingine mwalimu mmoja hufundisha wanafunzi wengi kinyume na miongozo ya sera ya elimu
Naye Damfa Sudi Ngwele kutoka Idara ya Usimamizi wa Elimu Ofisi ya Rais TAMISEMI alisema serikali imeanza kuchukua hatua kwa kuhakikisha walimu walioko pembezoni wanapata mazingira rafiki ya kufanyia kazi ikiwemo ujenzi wa nyumba za walimu ili kupunguza adha ya makazi kwa walimu wa vijijini
Kwa upande wake Shuwena Faki Haji kutoka Chama cha Walimu Zanzibar ambaye pia ni Afisa wa Masuala ya Jinsia kazini alisema bado kuna changamoto ya kutokuwepo kwa miundombinu ya kijinsia sehemu za kazi ambapo walimu wa kike hulazimika kutembea umbali mrefu kutafuta huduma za msingi kama vyoo na maji jambo ambalo linaathiri utendaji wao wa kazi
Cecilia Kessy ambaye ni mwalimu kutoka Wilaya ya Mafia alisema moja ya changamoto kubwa wanazokutana nazo ni usafiri ambapo walimu hulazimika kutembea umbali mrefu kufika shule huku wakikosa huduma muhimu kama umeme jambo linalowaathiri hata kwenye maandalizi ya kazi kama vile kupiga pasi na kuchapisha mitihani kutokana na utegemezi wa nishati ya sola isiyo na nguvu ya kutosha. Aliongeza kuwa baadhi ya walimu hulazimika kushea vyumba kwa kukosa nyumba za walimu jambo linalowadhalilisha na kushusha hadhi ya taaluma yao
oyce Kaishozi ambaye ni Katibu wa chama cha walimu Wilaya ya Chamwino alieleza kuwa walimu wa kike hukumbwa na changamoto zaidi hasa kipindi cha ujauzito na likizo ya uzazi kutokana na umbali wa vituo vya afya pamoja na ugumu wa kuwasilisha nyaraka zao kwa ajili ya mafao na likizo kwa njia ya mtandao kutokana na miundombinu duni ya mawasiliano.
Hata hivyo alisema chama cha walimu kimekuwa kikijitahidi kuwasaidia walimu hao kwa kutoa elimu na kufuatilia changamoto hizo kwa kushirikiana na mamlaka husika
Method Lupoli kutoka shirika la Policy Forum alisema wao kama wadau wa maendeleo wamekuwa wakishirikiana na mashirika ya kimataifa katika kuangazia changamoto hizi na kuwasilisha mapendekezo kwa serikali huku akisisitiza kuwa misamaha ya kodi inayotolewa na serikali imekuwa ikipunguza mapato muhimu ambayo yangeweza kuelekezwa katika sekta ya elimu kwa ajili ya kuboresha mazingira ya kazi kwa walimu wa kike waliopo pembezoni.
0 Comments