UKRAINE YARUSHA NDEGE ZISIZO NA RUBANI 221,URUSI YASEMA

 

Urusi inasema ilidungua ndege 221 za Ukraine zilizorushwa usiku kucha katika eneo lake, katika moja ya mashambulizi makubwa zaidi ya angani tangu mwezi Mei.

Zaidi ya nusu ya ndege hizo zisizo na rubani zilinaswa kwenye maeneo ya Bryansk na Smolensk, kusini-magharibi mwa Moscow, ambapo vituo vya Lukoil viliripotiwa kulengwa, wizara ya ulinzi ilisema.

Mamlaka katika eneo la Leningrad imesema ndege 28 zisizo na rubani zilidunguliwa na kuwa moto ulizuka kwenye meli katika bandari ya Baltic ya Primorsk, kituo kikubwa zaidi cha mafuta nchini Urusi. Waliongeza kuwa moto huo ulizimwa bila majeruhi.

Uzuiaji huo uliripotiwa katika takriban mikoa mingine tisa ya Urusi ikiwa ni pamoja na Kaluga, Novgorod na eneo la Moscow, ambapo ndege tisa zisizo na rubani zilisemekana kuharibiwa.

Vifusi vilishuhudiwa katika maeneo kadhaa, ingawa maafisa wa Urusi walisisitiza kwamba hakukuwa na majeruhi.

Watu saba, wakiwemo raia watano na wanajeshi wawili, walijeruhiwa wakati ndege isiyo na rubani iliposhambulia basi huko Bryansk, Gavana wa eneo hilo Alexander Bogomaz alisema.

Takwimu za Moscow, ambazo BBC imeshindwa kuthibitisha kwa uhuru, zinaonyesha shambulio la Alhamisi usiku lilikuwa mojawapo ya mashambulizi makubwa zaidi ya angani ya Ukraine katika kipindi cha miezi minne.

Urusi ilisema iliharibu ndege zisizo na rubani 524 mnamo Mei 7.

Wakati huo huo, maafisa walisema raia wawili waliuawa katika mkoa wa Sumy nchini Ukraine wakati bomu la kuongozwa mbali la Urusi liliposhambulia kijiji kimoja karibu na mpaka na kuongeza kuwa Urusi imetuma ndege zisizo na rubani 818 dhidi ya eneo lao katika wiki za hivi karibuni.