KOREA KASKAZINI INAWANYONGA WATU ZAIDI KWA KUTAZAMA FILAMU ZA KIGENI UN YABAINI

 

Ripoti kuu ya Umoja wa Mataifa imegundua kuwa serikali ya Korea Kaskazini inazidi kutekeleza hukumu ya kifo, ikiwa ni pamoja na watu wanaopatikana wakitazama na kushirikisha wengine filamu za kigeni na tamthilia za televisheni.

Utawala wa nchi hiyo wa udikteta ambao umesalia kutengwa na ulimwengu, pia unawalazimisha watu wake kufanyakazi huku ukizuia zaidi uhuru wao, iliongeza ripoti hiyo.

Ofisi ya Haki za Kibinadamu ya Umoja wa Mataifa iligundua kuwa katika muongo mmoja uliopita jimbo la Korea Kaskazini lilikuwa limeimarisha udhibiti wa "mambo yote ya maisha ya raia".

"Hakuna watu wa nchi nyingine walio chini ya vizuizi kama hivyo katika ulimwengu wa leo," ilihitimisha, na kuongeza kuwa ufuatiliaji "umeongezeka zaidi", ukisaidiwa kwa kiasi fulani na maendeleo ya teknolojia.

Kamishna Mkuu wa Umoja wa Mataifa wa Haki za Kibinadamu, Volker Türk, alisema ikiwa hali hii itaendelea, Wakorea Kaskazini "watakabiliwa na mateso zaidi, ukandamizaji wa kikatili na hofu ambayo wamevumilia kwa muda mrefu".

Ripoti hiyo iliyotokana na mahojiano zaidi ya watu 300 waliotoroka kutoka Korea Kaskazini katika kipindi cha miaka 10 iliyopita, iligundua kuwa hukumu ya kifo inatumiwa mara nyingi zaidi.

Angalau sheria sita mpya zimeanzishwa tangu 2015 zinazoruhusu adhabu hiyo kutolewa. Uhalifu mmoja ambao sasa unaweza kuadhibiwa kwa kifo ni kutazama na kushirikisha wengine maudhui ya vyombo vya habari vya kigeni kama vile filamu na michezo ya kuigiza ya televisheni, huku Kim Jong Un akijaribu kuzuia watu kufikia taarifa.

Watoro wa nchi hiyo waambia watafiti wa Umoja wa Mataifa kwamba kuanzia 2020 na kuendelea kumekuwa na mauaji zaidi kwa kusambaza maudhui ya kigeni. Walieleza jinsi mauaji haya yanavyotekelezwa na vikosi maalum tena hadharani ili kuwatia hofu watu na kuwakatisha tamaa ya kuvunja sheria.

Kang Gyuri, ambaye alitoroka mwaka wa 2023, aliambia BBC kwamba marafiki zake watatu waliuawa baada ya kukamatwa na maudhui ya Korea Kusini. Alikuwa kwenye kesi ya rafiki mmoja mwenye umri wa miaka 23 ambaye alihukumiwa kifo.

"Alihukumiwa pamoja na wahalifu wa dawa za kulevya. Uhalifu huu unachukuliwa kuwa sawa," alisema, akiongeza kuwa tangu 2020 watu wamekuwa na hofu zaidi.