Nahodha wa Tottenham Son Heung-min anasema kuwa ataondoka katika klabu hiyo msimu huu wa joto baada ya miaka 10.
Mchezaji huyo wa kimataifa wa Korea Kusini alijiunga na Spurs akitokea Bayer Leverkusen mwaka 2015 na amefunga mabao 173 katika mechi 454.
Alikuwa nahodha wakati Tottenham ilipoifunga Manchester United katika fainali ya Ligi ya Europa mwezi Mei na kutwaa taji lao la kwanza baada ya miaka 17.
Mchezaji huyo mwenye umri wa miaka 33, ambaye yuko chini ya mkataba na Spurs hadi 2026, yuko kwenye mazungumzo na klabu ya Ligi Kuu ya Soka ya Los Angeles FC.
Son alielezea uamuzi huo kama "mgumu zaidi ambao nimefanya katika kazi yangu" alipokuwa akizungumza na vyombo vya habari pamoja na meneja mpya Thomas Frank.
"Nilikuja London kaskazini nikiwa mtoto, nikiwa na umri mdogo sana, mvulana mdogo alikuja London ambaye hata hakuzungumza Kiingereza," Son alisema.
"Kuondoka kwenye klabu hii kama mtu mzima ni wakati wa kujivunia sana."
"Nahitaji mazingira mapya ya kujipa changamoto. Nahitaji mabadiliko kidogo, miaka 10 ni muda mrefu," Son aliongeza. "Nilitumia muda mwingi kutafakari kama nilitaka kupata uzoefu wa soka katika mazingira tofauti."
Tottenham wako Seoul kama sehemu ya maandalizi yao ya kabla ya msimu mpya, Son ataanza na nahodha wa timu dhidi ya Newcastle katika mechi yao ya kirafiki siku ya Jumapili, ikimaanisha kuwa mechi yake ya mwisho katika klabu hiyo inaweza kuchenzwa nchini mwake.
Frank, ambaye alichukua nafasi ya Ange Postecoglou kama kocha mkuu mwezi Juni, alimtaja Son kama "gwiji wa kweli wa Spurs" na "mmoja wa wachezaji wazuri zaidi kucheza katika Ligi Kuu".
0 Comments