WATOTO WANAOTENGENEZWA KWA KUTUMIA VINASABA (DNA) VYA WATU WATATU WAZALIWA BILA UGONJWA WA KURITHI

 

Watoto wanane wamezaliwa nchini Uingereza kwa kutumia chembe za urithi kutoka kwa watu watatu ili kuzuia hali mbaya za kiafya na mara nyingi za kuua, madaktari wanasema.

Njia hiyo, iliyoanzishwa na wanasayansi wa Uingereza, inachanganya yai na mbegu za uzazi za kiume kutoka kwa mama na baba na yai la pili kutoka kwa mfadhili.

Mbinu hiyo imekuwa halali hapa kwa muongo mmoja lakini sasa tuna uthibitisho wa kwanza kwamba inasababisha watoto kuzaliwa bila ugonjwa wa mitochondrial usiotibika.

Hali hizi kawaida hurithishwa kutoka kwa mama kwenda kwa mtoto, na kusababisha mwili kukosa nguvu.

Hii inaweza kusababisha ulemavu mkubwa na watoto wengine hufa ndani ya siku chache baada ya kuzaliwa. Wanandoa hufahamu kuwa wako hatarini kupata hali hiyo ya kiafya wakati watoto wa awali, wa wanafamilia au mama wameathiriwa.

Watoto wanaozaliwa kupitia mbinu ya watu watatu hurithi DNA zao nyingi, mwongozo wao wa kijeni, kutoka kwa wazazi wao, lakini pia hupata kiasi kidogo, karibu 0.1%, kutoka kwa mwanamke wa pili. Haya ni mabadiliko yanayorithishwa pia kwa vizazi.

Hakuna familia yoyote ambayo imepitia mchakato huo inayozungumza hadharani kulinda usiri wao, lakini wametoa taarifa zisizojulikana kupitia Kituo cha Uzazi cha Newcastle ambapo taratibu zilifanyika.