ASKARI MGAMBO WATAKIWA KUIMARISHA ULINZI WA NCHI

 

Askari  wa jeshi la akiba (MGAMBO)  wametakiwa kuyatumia mafunzo hayo kuilinda nchi yao kwani nchi hujengwa na kila mwananchi na sio kwenda kufanyia vitendo vya uhalifu 

Kauli hiyo imetolewa na Mkuu wa Wilaya ya Ulanga Ngolo Malenya wakati akifunga mafunzo ya Jeshi la akiba Wilayani Ulanga Mkoani Morogoro katika viwanja vya mapinduzi,na kusema kuwa ulinzi wa Nchi ni wa kila Mtanzania hivyo hao vijana waliohitimu mafunzo hayo wanatakiwa kuwa mstari wa mbele katika kuhakikisha nchi inakuwa salama

Ngolo amesema kuwa mafunzo waliyopata yatawasaidia kupata kazi sehemu mbalimbali ikiwemo kwenye  taasisi mbalimbali na makampuni ya  ulinzi hivyo  amewataka vijana hao kuwa na subira  kwa kuwa sasa wanafahamika  baada ya kuhitimu mafunzo yao 

Naye Mshauri wa Mgambo Wilayani Ulanga Meja Kevin Byabato  amesema kuwa wakati wanaanza mafunzo kulikuwa na jumla ya wanafunzi 80,lakini mpaka wanamaliza kulikuwa na jumla ya wahitimu 77 ambapo watatu walishindwa kumaliza mafunzo hayo na kuishia njiani

Aidha Meja Byabato amesema kuwa wanatoa mafunzo hayo kwa lengo la kusaidia vijana kuijenga Nchi yao hivyo yeyote atakaye kwenda kinyume na sheria za Nchi hatua kali itachukuliwa dhidi yake na Jeshi halitahusika kumtetea.