Akinamama wajasiriamali wa Mkoa wa Dar Es Salaam wamesisitiza kuhusu umuhimu wa amani katika jamii na ustawi wa familia, wakiwataka Watanzania kuwa wavumilivu na wenye subira katika kushughulikia changamoto za Kijamii na kisiasa walizonazo.
Akizungumza na waandishi wa habari kutokana na athari za matukio ya uvunjifu wa amani yaliyojitokeza siku na baada ya uchaguzi Mkuu wa Oktoba 29, 2025, Zainabu Juma, amesema mpaka hivi sasa biashara yake imefungwa kutokana na madeni yaliyotokana na siku tano walizoshindwa kufanya biashara, akisema yupo tayari kuunga mkono mchakato wa maridhiano ili kudumisha amani ya Tanzania.
"Tunaomba amani ya nchi yetu, Raia wenzetu tuwe na uvumilivu kwani angalieni sisi wa hali ya chini tulivyoathirika na mpaka leo tuna madeni tumefungiwa biashara zetu na hatujui tunalipaje. Ninapenda nchi yetu iwe na amani ili tuishi kwa amani na niseme tu tupo tayari kwa maridhiano maana tunaoumia ni sisi kuanzia ndugu zetu na familia kwa ujumla." Amesema Bi. Zainab Juma.
Tayari Rais wa Tanzania Mhe. Dkt. Samia Suluhu Hassan ameunda Tume kufanya uchunguzi kuhusu matukio hayo ya Oktoba 29, 2025 pamoja na kutangaza kuanza mchakato wa kitaifa wa maridhiano ili kusikilizana, kujadiliana na kutafuta suluhu ya pamoja dhidi ya kero na kadhia wanazokutana nazo makundi mbalimbali kwenye Jamii.
0 Comments