Waziri wa Mambo ya Nje na Ushirikiano wa Afrika Mashariki, Mhe. Balozi Mahmoud Thabit Kombo, amepokea nakala za Hati za Utambulisho kutoka kwa Balozi Mteule wa Jamhuri ya Kiislamu ya Iran nchini , Mhe. Mohammad Javad Hemmatpanah, katika hafla iliyofanyika kwenye ofisi ndogo za Wizara jijini Dar es Salaam.
Akizungumza katika hafla hiyo, Waziri Kombo alimpongeza Mhe. Hemmatpanah kwa uteuzi wake na kumhakikishia ushirikiano wa karibu kutoka Serikali ya Jamhuri ya Muungano wa Tanzania katika utekelezaji wa majukumu yake nchini.
Waziri Kombo alibainisha kuwa Tanzania na Iran zimekuwa na uhusiano wa muda mrefu na wa kirafiki, uliojengwa juu ya misingi ya kuheshimiana na maslahi ya pamoja. Aliongeza kuwa uhusiano huo unaendelea kuimarika katika maeneo mbalimbali yakiwemo biashara na uwekezaji, elimu na afya, nishati, pamoja na sayansi, teknolojia na ubunifu.
Kwa upande wake, Balozi Mteule Mhe. Hemmatpanah alieleza dhamira ya Serikali ya Iran kuendelea kupanua wigo wa ushirikiano na Tanzania katika sekta za uchumi na uwekezaji, dawa na famasia, pamoja na uendelezaji wa miundombinu.
0 Comments