Na Matukio Daima Media – Iringa
Chuo Kikuu Katoliki Ruaha (RUCU) kwa kushirikiana na Kituo cha Ubia kati ya Sekta ya Umma na Sekta Binafsi (Public–Private Partnership Center – PPPC) kimeandaa kongamano kubwa la kitaifa na kitaaluma lenye kaulimbiu “Ubia kati ya Sekta ya Umma na Sekta Binafsi (PPP) kama Nguzo ya Maendeleo Endelevu kuelekea Dira ya Taifa ya Maendeleo 2050.”
kongamano hilo litafanyika Jumatano, tarehe 09 Oktoba 2025 katika Ukumbi Mkuu wa RUCU mjini Iringa, kuanzia saa 2:00 asubuhi hadi saa 8:00 mchana.
Akizungumza na vyombo vya habari, Mauna Chuma Belius afisa Habari – Ruaha Catholic University (RUCU) na katibu wa Kamati ya Maandalizi Iringa, Tanzania alisema lengo kuu la kongamano hilo ni kujenga mjadala wa kitaalamu na wa kimkakati kuhusu mchango wa PPP katika utekelezaji wa Dira ya Taifa ya Maendeleo 2050.
“Kupitia kongamano hili, tunalenga kuongeza uelewa wa jamii kuhusu nafasi ya PPP katika kukuza uchumi, kubadilishana uzoefu wa kitaifa na kimataifa, pamoja na kutoa mapendekezo ya sera yatakayoongeza ushiriki wa sekta binafsi katika maendeleo endelevu,” alisema Belius.
Zaidi ya washiriki 500 kutoka sekta mbalimbali za elimu, serikali, sekta binafsi, dini, NGOs na vyombo vya habari wanatarajiwa kushiriki katika tukio hilo kubwa.
Belius alibainisha kuwa RUCU inaendelea kutekeleza majukumu yake makuu matatu ya kitaaluma ambayo ni kufundisha, kufanya utafiti, na kutoa huduma kwa jamii.
Amesema kupitia kongamano hilo, RUCU itakuwa moja ya watoa mada wakuu na itatumia nafasi hiyo kuonesha namna tafiti na elimu vinavyoweza kusaidia utekelezaji wa miradi ya ubia inayochochea maendeleo endelevu.
“RUCU inaendeleza tafiti zenye ushahidi wa kisera na inashirikiana na jamii kubuni suluhisho bunifu za maendeleo. Kongamano hili ni sehemu ya juhudi hizo,
Dira ya Taifa ya Maendeleo 2050 inalenga kuijenga Tanzania yenye uchumi wa juu, watu wenye maarifa, maadili na ustawi wa kijamii.
Kwa mujibu wa RUCU, kongamano hilo linaendana moja kwa moja na dira hiyo kwa kuwa litajadili mada kuu kama:
- PPP na mustakabali wa uchumi wa Tanzania kuelekea Dira ya 2050;
- Dira 2050 na nafasi ya elimu bora katika maendeleo ya rasilimali watu;
- Uchumi jumuishi na uboreshaji wa huduma za kijamii.
Miongoni mwa watoa mada wakuu watakaohudhuria ni:
- Prof. Christine Lekule – Dira 2050 na elimu bora kwa maendeleo ya rasilimali watu;
- Prof. Mushi – Uchumi jumuishi na uboreshaji wa huduma za kijamii;
- Mheshimiwa David Zacharia Kafulila – Mkurugenzi wa PPP, atakayezungumzia mustakabali wa uchumi wa Tanzania kuelekea Dira ya 2050.
Zaidi ya taasisi 100 kutoka sekta za elimu, dini, biashara, benki, mafuta, utalii na mashirika yasiyo ya kiserikali zimealikwa kushiriki.
RUCU na PPPC wameunda Kamati Maalum ya Maandalizi inayojumuisha wawakilishi kutoka sekta zote muhimu kuhakikisha ubora wa kitaaluma, kiufundi na teknolojia ya juu.
Kongamano litakuwa live kupitia vyombo vya habari vya kitaifa na mitandao ya kijamii, likitoa fursa kwa Watanzania wengi kufuatilia mjadala huo muhimu.
kuwa mgeni rasmi katika hafla hiyo atakuwa Mkuu wa Mkoa wa Iringa, Mheshimiwa Kheri James.
Hivyo aliwataka wadau waliopata fursa ya kualikwa kutambua fursa hiyo .
Hivyo kongamano hili la RUCU na PPPC litakuwa fursa kubwa kwa wamewataka wadau wote wa maendeleo, taasisi za elimu, sekta binafsi, dini, NGOs, pamoja na wananchi kwa ujumla kushiriki kikamilifu katika kongamano hilo.
“Ni fursa ya kihistoria kwa Mkoa wa Iringa na Tanzania kwa ujumla — kongamano litakalounganisha elimu, sera na maendeleo katika ajenda moja ya kitaifa,” alisema Belius.
0 Comments