DKT NDUMBARO: ASISITIZA UBUNIFU KWA WATUMISHI WA KATIBA NA SHERIA

 

Na Hamida Ramadhan,Matukio Daima App Dodoma

WAZIRI wa Katiba na Sheria, Dkt. Damas Ndumbaro, amesisitiza umuhimu wa ubunifu katika utendaji wa Serikali, akisema kuwa ugonjwa wa kukosa ubunifu umekithiri, hasa kwenye upande wa sekta ya Sera na Mipango.

 Akifungua mkutano wa pili wa Baraza la nane la Wizara hiyo jijini Dodoma, Dkt. Ndumbaro alionya dhidi ya matumizi ya mbinu za "kunakilisha," akisisitiza kuwa ni wakati wa kuachana na mtindo wa zamani wa kuiga bila mabadiliko.

Dkt. Ndumbaro ameeleza kwamba Wizara ya Katiba na Sheria ina jukumu kubwa la kusimamia na kutunga sheria zinazohusiana na haki za binadamu na utawala bora. 

Amewataka watumishi wa Wizara hiyo kufikiria nje ya mipaka ya kawaida, na kujenga mikakati mipya ambayo itakidhi mahitaji ya jamii katika nyakati za sasa.

Ameongeza kwamba ni muhimu kwa watumishi hao kuwa wabunifu katika kutunga sera na mipango, ili kuhakikisha kuwa Wizara inatekeleza majukumu yake kwa ufanisi na kwa njia ya kisasa.

 "Hii ni nafasi yetu ya kubadilisha mambo, lazima tuwe na mawazo ya mbali na ya kiubunifu," alisema Dkt. Ndumbaro.

Aidha, amesisitiza umuhimu wa kulinda haki za wafanyakazi na kusimamia wajibu wa ufanyaji kazi, akiwataka watumishi hao kuhakikisha kwamba wanatekeleza majukumu yao kwa ufanisi ili kuboresha mazingira ya kazi na kuimarisha haki za wafanyakazi nchini.

 Kwa ujumla, ameeleza kwamba ni wajibu wa kila mmoja kuleta mabadiliko chanya kwa ajili ya maendeleo ya nchi.

Kwa upande wake, Katibu Mkuu wa Wizara ya Katiba na Sheria, Eliakimu Maswi, amewapongeza wajumbe wa baraza hilo kwa juhudi zao na kujitolea kwao katika kuboresha kazi za Wizara. Alisema kwamba ushirikiano wao ni muhimu katika kutekeleza malengo ya serikali na kuimarisha mifumo ya sheria nchini.

Maswi amesisitiza umuhimu wa kufanya kazi kwa pamoja na kutumia fursa ya mkutano huo kujadili changamoto zinazoikabili Wizara, huku akitafuta suluhisho zinazoweza kuboresha huduma kwa wananchi. 

Amewataka wajumbe hao kuleta mawazo mapya na kufikiria kwa ubunifu ili kuhakikisha Wizara inakuwa na uwezo wa kukabiliana na mabadiliko ya mazingira ya kisheria na kijamii.