WAANDISHI WA HABARI WAJENGEWA UWEZO WA KUANDIKA HABARI ZA USAWA WA KIJINSIA

NA AMINA SAIDI, TANGA 

Waandishi wa Habari wameaswa kuandika habari zenye kuleta matokeo chanya kwa jamii zitakazoweza kuchochea mabadiliko juu ya kuondokana na ukandamizaji na unyanyasaji wa kijinsia.

Wito huo umetolewa na Mkurugenzi mtendaji wa umoja wa vilabu vya Waandishi wa habari Tanzania (UTPC) Kenneth  Simbaya wakati akifungua mafunzo ya siku tatu  ya usawa wa kijinsia kwa wanachama 27 wa klabu za mikoa ya Tanzania bara na Visiwani.

Mkurugenzi Kenneth amesema vyombo vya habari vina nafasi kubwa ya kuondoa changamoto ya ukandamizaji na unyanyasaji wa kijinsia unaofanyika ili kufikia malengo ya Serikali katika kukabiliana na tatizo hilo.

Aidha Mkurugenzi huyo amewataka waandishi hao kutumia fursa ya mafunzo hayo kwa kuandaa vipindi na kuandika habari ambazo zitakazoleta mabadiliko.

Kwa upande wa Waandishi walioshiriki mafunzo hayo wameahidi kufanyia kazi taaluma wanayoipata ili kuleta usawa wa kijinsia katika jamii pamoja na kuondosha ukatili dhidi ya wanawake na watoto.

Mafunzo hayo ya siku tatu yanayofanyika Mkoani Morogoro yameandaliwa na umoja wa vilabu vya Waandishi wa habari Tanzania (UTPC).