Mtu aliyekamatwa kufuatia tukio la ufyatuaji risasi lililotokea Jumamosi wakati wa hafla ya Waandishi wa Habari wa Ikulu (White House Correspondents' Dinner), ametambulika kuwa ni Cole Tomas Allen, mkazi wa eneo la Los Angeles, kwa mujibu wa afisa wa vyombo vya sheria.
Taarifa zinaonesha kuwa mtuhumiwa huyo anaonekana kupitia mitandao ya kijamii kuwa mhitimu wa taasisi ya California Institute of Technology (Caltech), akifanya kazi kama mwalimu wa kujitolea na mhandisi wa michezo ya kompyuta.
Afisa huyo alieleza kuwa Allen, mwenye umri wa takribani miaka 31, ni mkazi wa Torrance, California, mji wa pwani uliopo katika eneo la South Bay karibu na Los Angeles, ukipakana na Ghuba ya Santa Monica.
Mkuu wa Polisi wa Columbia amesema wachunguzi wanaamini mtuhumiwa alikuwa miongoni mwa wageni waliokuwa wamefikia katika hoteli ya Washington Hilton Hotel, ambako hafla hiyo ya kila mwaka ilikuwa ikifanyika, huku chanzo cha tukio hilo kikiwa bado hakijafahamika.
Kwa mujibu wa machapisho yanayohusishwa na mtuhumiwa kwenye mitandao ya kijamii, Allen alitajwa kuwa "Mwalimu Bora wa Mwezi" Desemba 2024 na ofisi ya Torrance ya C2 Education, taasisi binafsi ya kitaifa inayotoa huduma za maandalizi ya mitihani na mafunzo kwa wanafunzi wanaojiandaa kujiunga na vyuo vikuu.
Wasifu wake wa Linkedin unaeleza kuwa ni "mhandisi na mwanasayansi wa kompyuta kwa taaluma, mtengenezaji wa michezo ya kompyuta na mwalimu kwa kuzaliwa."
Inaelezwa kuwa alipata shahada ya kwanza ya uhandisi wa mitambo kutoka Caltech mwaka 2017, na shahada ya uzamili ya sayansi ya kompyuta kutoka California State University, Dominguez Hills mwaka 2025. Taasisi ya Caltech imethibitisha kuwa mtu mwenye jina hilo alihitimu mwaka 2017.
Katika uzoefu wa kazi, taarifa zinaonyesha kuwa kwa miaka kadhaa amekuwa akifanya kazi kama mwalimu wa muda katika C2 Education pamoja na kuwa msanifu wa michezo ya kompyuta kwa kujitegemea.
Aidha, awali aliwahi kufanya kazi kama mhandisi wa mitambo katika kampuni ya IJK Controls iliyopo South Pasadena kwa mwaka mmoja, kabla ya kuwa mkufunzi msaidizi katika Caltech.
0 Comments