VIONNGOZI WA SERIKALI YA WANAFUNZI WA SAME BOYS WAJIFUNZA MASULUHISHO YA KIFEDHA KUTOKA NMB BANK

Na Ashrack Miraji Matukio Daima App 

Katika juhudi za kujifunza masuala ya kifedha kwa vitendo, viongozi wa serikali ya wanafunzi wa Shule ya Sekondari ya Same Boys walifanya ziara maalum katika tawi la Benki ya NMB lililopo wilaya ya Same. Ziara hiyo ilikuwa na lengo la kutoa fursa kwa wanafunzi hao kujifunza kwa karibu jinsi taasisi ya hiyo ya kifedha inavyotoa huduma na suluhisho kwa wananchi katika maisha ya kila siku.

Wanafunzi hao walipokelewa kwa ukarimu na Meneja wa benki hiyo,  Saad Masawila, ambaye aliwakaribisha na kuwapongeza kwa kuonyesha juhudi za kujielimisha nje ya darasa.  Masawila alisisitiza umuhimu wa elimu ya kifedha kwa vijana, akisema kuwa uelewa wa masuala ya fedha unawaandaa wanafunzi kuwa raia bora na viongozi wa kesho.

Katika mazungumzo yao na wanafunzi, wafanyakazi wa benki hiyo walielezea huduma mbalimbali zinazotolewa na NMB, ikiwa ni pamoja na mikopo kwa wajasiriamali, huduma za kuweka na kutoa fedha, na elimu kwa jamii juu ya usimamizi wa fedha. Wanafunzi walipata fursa ya kuuliza maswali na kushiriki katika mijadala ya wazi kuhusu changamoto na fursa zilizopo katika sekta ya kifedha.

Mbali na kujifunza, ziara hiyo pia ililenga kuimarisha mahusiano kati ya taasisi za elimu na taasisi za kifedha katika wilaya ya Same. Uongozi wa shule uliishukuru benki ya NMB kwa kuwa tayari kutoa muda na maarifa kwa vijana, na kueleza kuwa elimu waliyoipata itasaidia kubadilisha mtazamo wao kuhusu matumizi ya fedha na kujenga nidhamu ya kifedha.

Kwa ujumla, ziara hiyo ilikuwa yenye mafanikio makubwa, na iliwatia moyo wanafunzi kuendelea kuwa na bidii katika masomo yao na kuwa wabunifu katika kutafuta maarifa nje ya mihadhara ya kawaida. Benki ya NMB imeahidi kuendelea kushirikiana na shule mbalimbali ili kuwajengea vijana misingi imara ya kifedha.