xxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxx
NA CHAUSIKU SAID,MATUKIO DAIMAAPP MWANZA.
Vifo vitokanavyo na magonjwa yasiyoambukiza vinachangia takribani asilimia 33 hapa Nchini huku ugonjwa wa kisukari ukiwa ni 9.10%
Hayo yamesemwa na Kaimu Meneja Mpango wa Kudhibiti Magonjwa Yasiyoambukiza Valeria Milinga kwenye madhimisho ya siku ya Kisukari Duniani ambayo Kitaifa yamefanyika Wilaya ya Misungwi Jijini Mwanza.
Millinga ameeleza kuwa kutokana na Tafiti zilizofanyika katika halmashauri 50 hapa Nchini ambapo katika Nchini kumi(10) zinazoongoza Kwa ugonjwa wa kisukari Barani Afrika huku Tanzania ikiwa nafasi ya nane.
"Katika kuongeza uhamasishaji na uelewa kwa wananchi juu ya magonjwa yasiyoambukiza hasa ugonjwa wa kisukari tumeweza kufanya maonyesho ya wiki ya magonjwa yasiyoambukiza yaliyoanza tarehe 5-12, Novemba 2022 ambayo yanafanyika kila mwaka." Amesema Bi. Milinga
Aidha, Milinga ametaja mafanikio ya maonyesho hayo kwa mkoa wa Mwanza hadi kufikia siku ya kilele tarehe 12, Novemba, 2022 wananchi takriban 3000 wamejitokeza kupima ugonjwa wa Kisukari na 34 kati yao wamegundulika kuwa na ugonjwa huo.
Hata hivyo, amebainisha mafanikio waliyoyapata katika utoaji wa huduma za kisukari ikiwemo upatikanaji wa Dawa, utoaji wa mafunzo kwa watoa huduma za Afya katika Vituo 300 kwenye Mikoa 9.
Kwa upande wake Katibu Tawala wa Wilaya ya Misungwi Petero Sabato ambaye alikuwa Mgeni rasmi katika maadhimisho Hayo ameeleza kuwa Watanzania wanahitaji elimu zaidi ili waweze kuepukana na magonjwa yasiyoambukiza ikiwemo ugonjwa wa Kisukari ambao umekua ukiongezeka nchini.
"Elimu inahitajika zaidi ili kuwakinga wananchi na Magonjwa Yasiyoambukiza hasa Kisukari kwa kuwa ugonjwa wa Kisukari umekua ukigharimu maisha ya watu ikiwa ni pamoja na kukatwa baadhi ya viungo ." Amesema Sabato
Sabato ametoa rai kwa wananchi kufanya mazoezi sambamba na kupima Afya angalau mara moja kwa mwaka ili ukigundulika mapema inakuwa rahisi kupata matibabu.
Naye, Mwenyekiti wa Chama cha Kisukari Tanzania Prof. Andrew Swai amesema miaka ya 1991 kulikuwa na 1% tu ya ugonjwa wa kisukari nchini lakini kwa sasa imeongezeka hadi kufikia 9%.
"Kutokana na ongezeko la ugonjwa wa kisukari nchini imekua tatizo ambapo inagharimu 20% ya bajeti ya Serikali ili kuwahudumia wagonjwa hao." Amesema Prof. Swai
Baadhi ya wagonjwa wa kisukari wameeleza kuwa serikali Ina haja ya kuendelea kutoa elimu Kwa jamii ili wawe na tabia ya kupima magonjwa yasiyoambukiza.
" Bado jamii nyingine hazina uelewa juu ya magonjwa haya na inapotokea mtu anaumwa magonjwa haya hawaendi kwanza hospital wanakimbilia kwenye dawa za kienyeji" Walisema.
Maadhimisho hayo yameandaliwa na Wizara ya Afya kwa kushirikiana na wadau wa Chama cha Kisukari Tanzania (TDA), Shirikisho la Vyama vya Magonjwa Yasiyoambukiza (TNCDA) na viongozi wa Mkoa wa Mwanza wakiongozwa na Mkuu wa Wilaya.
0 Comments